O secretario xeral do PSdeG remarcou o compromiso do seu partido na loita polos dereitos das mulleres
O secretario xeral do PSdeG, Valentín González Formoso, enxalzou este sábado, na entrega duns premios internos, a loita pola igualdade de Rosa Gómez Limia, primeira deputada de esquerdas na cámara galega, e de Mulleres Salgadas, a maior asociación de mulleres no sector do mar en Galicia. No acto o líder do PSdeG, xunto coa secretaria de Igualdade da dirección galega, Silvia Fraga, e o alcalde de Santiago, Xosé Sánchez Bugallo, remarcou o compromiso do seu partido na loita polos dereitos das mulleres.
Formoso salientou de Gómez Limia que “abriu unha brecha na igualdade na política para que a muller teña a representatividade que ten que ter”. Militante dende 1979 e parlamentaria dende 1988, “reclamou constantemente a incorporación da muller na vida política, sendo un exemplo para moitas compañeiras que a seguirían”.
O líder socialista tamén reivindicou o traballo da asociación Mulleres Salgadas pola igualdade de dereitos no mundo do mar, sendo a súa presidenta, Loli Gómez, quen recibiu o premio. Formoso destacou que este colectivo loita nun sector estratéxico onde “a muller é moitas veces maltratada e escóndese o seu papel relevante”, lembrando que das 63 confrarías galegas, só hai 3 patroas maiores. Neste ámbito o socialista considera que hai moito por facer, da nova Lei de Pesca Sostible impulsada polo PSOE a nivel estatal que “recoñece os mesmos dereitos á hora de xubilarse” a estas mulleres que aos homes.