Catro meses despois de que o popular asistise á concentración pola unidade de España convocada polo ex-alcalde coruñés, o presidente elíxeo como presentador dun acto seu en Madrid
No Hotel Palace de Madrid, xusto fronte ao Congreso dos Deputados, o presidente Feijóo pronunciou este martes ante empresarios, políticos e xornalistas un discurso no que repetiu boa parte dos seus argumentos habituais, desde presentarse a si mesmo como un político por riba das diferenzas partidarias ata criticar os supostos ataques do Goberno central a Galicia. A principal novidade, desta volta, foi que a súa intervención foi presentada polo ex-alcalde da Coruña polo PSOE Francisco Vázquez, que gabou a figura de Feijóo como un “dos poucos políticos que dá continuidade á Transición”.
Segundo Vázquez, Feijóo “desmontou en Galicia o discurso identitario, o discurso excluínte do separatismo e do nacionalismo soberanista”
A elección de Vázquez como presentador do acto de Madrid, algo que xa fixera noutro almorzo informativo similar en Santiago en 2015, prodúcese agora despois de que hai catro meses Feijóo secundase a concentración pola unidade España convocada polo ex-rexedor na Coruña. Este martes, en Madrid, Vázquez gabou que Feijóo “desmontou en Galicia o discurso identitario, o discurso excluínte do separatismo e do nacionalismo soberanista”.
Para o ex-rexedor, o de Feijóo é “un estilo nórdico” por facer “da revolución da normalidade” un xeito de gobernar
Vázquez foi máis aló e chegou a dicir que o discurso e o xeito de gobernar de Feijóo fai “sentirse cómodos a socialdemócratas”, como el mesmo se definiu -hai uns meses optaba por cualificarse a si memos como "crispador, e a moita honra"-, ou a galeguistas ou nacionalistas. Segundo o ex-rexedor, o de Feijóo é “un estilo nórdico” por facer “da revolución da normalidade” un xeito de gobernar.
