Dúas caravanas electorais simultáneas que prevén percorrer uns 25.000 quilómetros ata o 10 de xullo, derradeiro día da campaña das eleccións galegas. Galicia en Común presentou este luns o seu plan para campaña electoral que comeza este día 26 de xuño, na que a coalición se propón "chegar a cada vila e a cada barrio" para "convencer á xente progresista de que o cambio é posible e necesario", di o seu aspirante á Xunta, Antón Gómez-Reino.
Acompañado por Luca Chao, número dous pola Coruña, e por Miguel Anxo Fernán-Vello, cabeza de lista por Lugo, Gómez-Reino advertiu da repercusión en clave interna e externa destes comicios. Fronte a enquisas que manteñen o PP na maioría absoluta, o candidato proponse facer ver que "vai haber cambio político no país" e que, ademais, esa mudanza en Galicia "vai consolidar o ciclo de goberno progresista no Estado".
GeC sinala "o traballo de compañeiras como Yolanda Díaz" no Goberno do Estado para apelar á necesidade dun cambio político en Galicia
Neste sentido, o Goberno de coalición no Estado será sinalado por Galicia en Común como referente para Galicia. O exemplo, sinala Chao, é "o traballo de compañeiras como Yolanda Díaz", ministra de Traballo, que "demostra que é posible unha saída distinta á crise". Esa será a mensaxe que dirixan especialmente á xente moza que, resaltan, "apenas viviu catro anos fóra dun goberno do PP; se elas e eles confían en nós, o 12 de xullo podemos construír un futuro que aposte pola xustiza social".
As caravanas de Galicia en Común combinarán os actos presenciais, condicionados polas restricións para evitar contaxios do coronavirus, con eventos específicos a través de internet. "Estarei cada noite conectado con referentes da política estatal e internacional cunha conexión en aberto na que calquera persoa poderá preguntar e participar", avanzou Gómez-Reino.
Investimento en I+D+i
Nun encontro con persoal investigador agrupado en Investigal, o candidato de GeC promete "investir o 2% do PIB galego" en I+D+i nunha lexislatura se a esquerda goberna en Galicia
Na mesma xornada, Gómez-Reino e Chao mantiveron tamén un encontro co colectivo de persoal investigador Investigal, creado recentemente para reivindicar máis e mellores condicións para o labor científico no país. Este colectivo, sinala o candidato, é boa mostra da "precarización e a fuga de talento" do persoal científico polo que a Xunta do PP "non apostou".
Neste sentido, resalta o candidato, o programa de Galicia en Común contempla a posta en marcha do Plan Galego de I+D+i 2020-2024."O compromiso -sintetiza- pasa por investir o 2% do PIB galego no sector" e así achegarse á "media dos países da Unión Europea".
