A segunda memoria anual do novo sistema de transporte sinala como aspectos por mellorar "a puntualidade e os relacionados co estado das paradas e a información dispoñible para as persoas usuarias en paradas e no interior dos vehículos"

A segunda memoria anual sobre o funcionamento do novo sistema de transporte público de Galicia implantado en 2020 pola Xunta vén de revelar o empeoramento xeral do servizo, segundo inspeccións secretas realizadas en 1.795 viaxes. Se na primeira memoria, feita pública hai un ano sobre o período 2020-21, a valoración xeral do servizo era do 84,1%, nesta segunda memoria, do período 2021-22 e feita pública nas últimas semanas, esa valoración global cae ao 83,4%. E dos dez aspectos analizados sete empeoran, especialmente a puntualidade do servizo, que pasa do 70,33% ao 61%. 

Isto é, catro de cada dez viaxes inspeccionadas en secreto non foron puntuais, e no global da valoración preto do 17% dos servizos analizados incumpriron algún aspecto da concesión.

Para a anterior memoria do Plan de Transporte Público de Galicia a Xunta recorrera a inspeccións de 2.129 viaxes coa técnica do "cliente misterioso", que consiste en que persoal cualificado se fai pasar de forma anónima por usuario do servizo para valorar o seu funcionamento. Nesta segunda memoria esa mesma técnica de inspeccións secretas aplicouse a 1.795 viaxes entre os 1,8 millóns de servizos ao ano en días laborables de período lectivo.

Persoal cualificado fíxóse pasar por persoas usuarias en preto de 1.800 viaxes e constatou un 17% de incumprimentos nalgún aspecto das concesións

Segundo salienta a propia Xunta na memoria, estas inspeccións secretas "reflicten como puntos fortes do transporte público de Galicia o sistema de validación do billete, o trato recibido por parte do condutor/a e o bo aspecto do autobús, ademais da sensación de seguridade das persoas viaxeiras e o alto confort nos vehículos. 

Porén, mesmo entre eses aspectos ben valorados nas inspeccións hai empeoramentos a respecto da anterior memoria anual. Así, xunto co empeoramento da puntualidade, tamén cae a valoración do aspecto exterior do vehículo, do confort e limpeza do vehículo, do aspecto e atención do persoal de condución, do tipo de condución, e da seguridade. Pola contra, e malia que seguen entre os aspectos peor valorados, melloran a súa puntuación as paradas e a información do vehículo, mentres que apenas varía o proceso de validación do billete.

Segundo a Xunta, a campaña de inspeccións secretas, que se desenvolveu entre abril e xuño do pasado ano, detectou que "existen algúns aspectos cunha valoración inferior que requiren actuacións específicas, como son a puntualidade e os relacionados co estado das paradas e a información dispoñible para as persoas usuarias en paradas e no interior dos vehículos".

A Xunta tamén fixo enquisas a persoas usuarias e obtivo unha satisfacción global similar á do ano anterior, de 7,89 sobre 10

Ademais das inspeccións secretas, a memoria anual tamén reflicte, como a do ano pasado, os resultados dunha enquisa a persoas usuarias do transporte público. Se o ano anterior foron enquisadas 13.201 persoas, desta volta foron 13.254. Esas consultas ponderaron non só a valoración do usuario de cada aspecto do servizo senón tamén a relevancia que cadaquén deu a eses aspectos. Así, os aspectos que os usuarios consideran máis relevantes e que á vez valoraron con menor puntuación foron os relativos ao estado das paradas, a información do servizo ou a puntualidade, como nas enquisas do ano anterior. E ao igual que na memoria previa, a mellor puntuación dos usuarios foi para o prezo do billete, a duración da viaxe ou o trato do condutor. 

Neste tipo de enquisas a persoas usuarias a memoria da Xunta agora feita pública sinala que o índice de satisfacción do cliente global foi de 7,89 sobre 10 no último ano, fronte a 7,90 do ano anterior, mentres que un 78,5% das persoas consultadas recomendarían o servizo fronte ao 79% do ano anterior.