Victor d'Hondt (Gante, Bélxica 1841-1901) era xurista e matemático. Combinou ambos labores na creación do sistema que está nunha lei, pero non é unha lei, e que este 23 de xullo volverá servir para transformar os votos emitidos polo electorado das eleccións xerais en escanos do Congreso dos Deputados.

A Lei Orgánica do Réxime Electoral Xeral establece que o método d'Hondt é o empregado para asignar escanos ás diferentes formacións políticas en funcións do número de votos obtidos. O seu método -que non lei- é o utilizado no sistema electoral español, pero tamén en moitos outros, e adoita levar culpas -por exemplo, sobre o maior peso duns territorios sobre outros- que adoitan ser alleos a el.

A proporcionalidade do sistema d'Hondt para asignar escanos aumenta ou diminúe en función de factores como o tamaño da circunscrición. O sistema pode provocar que en cada provincia a forza menos votada con dereito a escano poida acabar disputando un posto á que tivo máis votos

A regra que este 28X volverá poñerse en marcha para asignar os escanos do Congreso foi concibida para tender á proporcionalidade na distribución. No entanto, esta proporcionalidade aumenta ou diminúe en función de factores como o tamaño da circunscrición, que neste caso son as provincias. 

Nas circunscricións menos poboadas, como Lugo ou Ourense, a proporcionalidade do sistema é menor e tende a primar as forzas máis votadas. Non en van, cando foi encaixado na vixente lei electoral, apostouse por construír un modelo tendente ao bipartidismo.

Neste vídeo resumimos mediante unha simulación de votos e escanos nunha circunscrición imaxinaria o funcionamento da regra d'Hondt. Tamén algún dos seus elementos máis característicos, como que a forza con menos votos entre as que entran ao reparto do escanos -en eleccións xerais o limiar é do 3%, nas galegas elévase ao 5%- poida acabar disputando un asento parlamentario ao partido con máis votos.