"Se o PPdeG é o partido que máis se parece a Galicia é porque, ao igual que Castelao, mantemos sempre o vínculo coa nosa terra, co noso idioma e coa nosa cultura", din os populares
Destacados membros do PPdeG, incluída a súa secretaria xeral, Paula Prado, e o conselleiro de Cultura, José López Campos, visitaron este venres a exposición Castelao. Mirar por Galicia que acolle a Cidade da Cultura ata o 11 de xaneiro con motivo do Ano Castelao 2025. Nela o conselleiro de Cultura asegurou que "se o PPdeG é o partido que máis se parece a Galicia é porque, ao igual que Castelao, mantemos sempre o vínculo coa nosa terra, co noso idioma e coa nosa cultura".
Pero ao tempo que compararon as súas políticas con Castelao, os populares rexeitaron "calquera intento de politización" da súa figura. "Castelao non pode ser a referencia exclusiva dunha ideoloxía concreta", din os populares, obviando así a traxectoria política concreta de Castelao.
A número 2 do PPdeG pide valorar a Castelao "fóra de ideoloxías"
Segundo a secretaria xeral e número 2 do PPdeG, Paula Prado, "é moi importante poñer a súa figura en valor, pero tamén fóra de ideoloxías e que ninguén poida patrimonializar a figura de Castelao".
"Somos galegos e por iso coidamos o noso, o que nos identifica e traza o noso pasado, presente e futuro", engadiu Prado.
