Os populares substitúen a petición do PSdeG para amosar solidariedade coas vítimas do "xenocidio", apoiada polo BNG, por outra de "solidariedade e respecto" con quen padecen a "inxustificada acción militar" de Israel e mais coas "vítimas do terrorismo de Hamás"
Este pasado luns o PSdeG levou á Mesa do Parlamento, órgano reitor da Cámara, a solicitude de gardar un minuto de silencio "polas vítimas do xenocidio de Gaza" no inicio do pleno que comezou este martes. A propostas foi votada neste órgano e recibiu o apoio do BNG, mentres que o PP se opuxo. A ausencia dunha das representantes dos populares deste órgano de 5 membros, Elena Candia, deu lugar a un empate: 2 "non" dos conservadores e dous "si" das representantes nacionalista e socialista, o que propiciou que o presidente da institución, Miguel Santalices, adiase a decisión.
O secretario xeral do PSdeG, José Ramón Gómez Besteiro, trasladou a reclamación ao inicio da sesión plenaria. Outra volta, obtivo o apoio do BNG. E unha vez máis, o xefe do lexislativo optou por adiar a cuestión abeirándose en cuestións formais como que non recibira a comunicación da postura dos voceiros de todos os grupos sobre a cuestión, adiándoa para unha nova xuntanza da Mesa, fixada para este mesmo martes ás tres da tarde.
Apenas 25 minutos antes da xuntanza o voceiro do PP, Alberto Pazos, rexistrou unha petición de seu. Outro minuto de silencio, pero esquivando o termo "xenocidio" e estendéndoo aos "inocentes civís" tanto de Palestina como de Israel.
Segundo o texto, ao que puido acceder Praza.gal, os populares solicitan esa mostra simbólica de solidariedade "ante o masivo asasinato de civís producido pola invasión de Gaza en resposta aos atentados perpetrados en territorio israelí pola organización terrorista Hamás". Trátase de amosar, indica, "solidariedade e respecto" aos "inocentes civís palestinos vítimas" da "inxustificada acción militar ordenada polo Goberno de Israel" e cos "inocentes civís israelís vítimas do terrorismo de Hamás".
Os conservadores teñen garantido, dada a súa maioría absoluta, que o texto rexistrado por Pazos substitúa a reclamación de Besteiro. Nela, ademais de referirse explicitamente ao "xenocidio", figuraba que "milleiros de persoas inocentes —entre elas 20.000 nenos e nenas— foron asasinadas, os seus fogares arrasados e as condicións mínimas de vida destruídas" en Gaza. E por iso consideraba que o Parlamento "debe expresar a súa solidariedade coa dor que sofren milleiros de persoas, manifestar o noso rexeitamento a esta violencia indiscriminada e apoiar con firmeza os esforzos da comunidade internacional para acadar unha paz xusta e duradeira na rexión”
Durante anos, as mostras de solidariedade do Parlamento de Galicia co pobo palestino aprobadas por unanimidade foron habituais sen que o PP esixise que incluísen equiparación ningunha. Do mesmo xeito, a Cámara galega lembrou e homenaxeou as vítimas do Holocausto en diversas ocasións sen que nesas declaracións unánimes houbese referencias a outros conflitos ou crimes.
