"É un esperpento que o galego vaia ser defendido polo lehendakari e polo presidente de Catalunya, pero non polo presidente de Galiza", cre a líder do BNG
"Un auténtico despropósito, unha vergoña". A portavoz nacional do BNG, Ana Pontón, reaccionou este venres a medio camiño entre o estupor e a contrariedade ao confirmarse que o presidente da Xunta, Alfonso Rueda, se negou a asinar canda os seus homólogos de Euskadi e Catalunya unha carta dirixida aos Estados membros da Unión Europea para defender a oficialidade dos respectivos idiomas nas institucións comunitarias.
"É un esperpento que o galego vaia ser defendido polo lehendakari e polo presidente de Catalunya, pero non polo presidente de Galiza", quen ve "moi preocupante" que Rueda "poña paus nas rodas" ante unha cuestión que, admite, "ten a súa complexidade" -vén volver ser adiada por falta de acordo-. E por iso, subliña a líder do Bloque, é tan "importante seguir mantendo o debate e a presión".
"Este -reflexiona Pontón- é o pacto que ofrecen" dende a Xunta a prol do galego. "Facelo unha lingua de segunda", razoa. Do seu punto de vista, "non merecemos un presidente que traballa contra o recoñecemento internacional do galego".
"Quen non ama a súa lingua non pode amar o seu país", di Besteiro para censurar que Rueda "non se sume á defensa do noso idioma" que fan Illa e Pradales
Para o secretario xeral do PSdeG, que este venres compartiu xornada de traballo en Vigo, Santiago e A Coruña co presidente catalán, que Rueda "non validase esa carta" xunto a Salvador Illa e Imanol Pradales é "unha triste noticia". E un evidente paradoxo que "eles se sumen á defensa do noso idioma, pero non o presidente da Xunta".
"É triste", incide José Ramón Gómez Besteiro, porque "quen non ama a súa lingua non pode amar o seu país". Mentres, di, o PSdeG, igual que o PSC, si están a prol dunha oficialidade que é mostra do "orgullo" co que, afirma, os socialistas "defendemos esta riqueza cultural en España e en Europa". A lingua, precisamente, é un dos eixos dos grupos de traballo constituídos durante o encontro entre os socialistas galegos e cataláns.
Illa: "Gustaríame que Rueda asinase"
"Non imos parar, porque temos razón e isto vai acabar saíndo", afirma o presidente catalán
Durante unha comparecencia ante os medios con Besteiro en Santiago, o propio Illa evidenciou que Rueda -este venres de visita oficial en Extremadura- recibiu o ofrecemento de sumarse á carta. "Claro que estaba ao corrente" porque nin el nin o lehendakari "actuamos a escondidas de ninguén". "Gustaríame que asinase" e, agrega, será ao propio xefe do Goberno galego ao que "corresponda dar explicacións" sobre por que non o fixo.
Neste sentido, alén de que Rueda aclare os motivos, Illa expresa tamén o seu desexo de que o ex-presidente Feijóo, como líder do PP, "dese instrucións ao seu partido para que non obstaculizase a oficialidade das linguas en Europa". "Que teima con esa uniformidade, que problema hai?", pregúntase ante un debate sobre o que, advirte, "a mensaxe" que quere transmitir é que "non imos parar" porque "temos razón" e "isto vai acabar saíndo".
