A portavoz nacionalista lembra que as eleccións municipais son o inicio dun ciclo político con catro comicios nun ano que rematarán coas galegas como moi tarde en xullo de 2024
O BNG celebrou este sábado un Consello Nacional centrado na preparación das eleccións municipais do 28 de maio no que a súa portavoz nacional, Ana Pontón, asegurou que a formación “representa o entusiasmo, a vitalidade, e o optimismo que tanto necesita Galiza e a sociedade galega”. “Somos capaces de poñer en marcha as solucións máis vangardistas e avanzadas adaptadas á nosa realidade e os concellos onde gobernamos son o mellor exemplo de como construír vilas e cidades con futuro” salientou.
“Cando temos que pensar en concellos galegos que son referentes aquí e fóra en quen pensamos? Nos concellos do PP? Do PSOE? Non”, dixo Pontón, para citar Allariz, Pontevedra, Carballo ou Ribadeo como concellos gobernados polo BNG que son “exemplo de que unha nova Galiza se vai facendo realidade desde abaixo, concello a concello”.
Pontón tamén destacou que estamos ante uns comicios que decidirán os gobernos dos concellos galegos pero que tamén supoñen o inicio “dun ciclo decisivo para o futuro do noso país” con catro procesos electorais consecutivos nun ano: eleccións municipais, xerais, europeas e galegas, estas últimas a celebrar como moi tarde en xullo de 2024. Por iso, dixo, estamos nun momento político que supón “unha grande oportunidade para o BNG e dende o BNG non nos poñemos límites porque iso é o que no pide este momento histórico e o que nos demanda Galiza”.