Alfonso Rueda dá por "pechado" o "debate ambiental" sobre Altri. "Por moito que lles pese", dixo o presidente da Xunta para responder ás críticas da oposición polo seu apoio —e o do seu goberno— á planta que a multinacional portuguesa prevé instalar en Palas de Rei. 

"O debate ambiental de Altri está pechado, por moito que lles pese; o debate é se en Galicia queremos postos de traballo e investimentos", di Rueda

Nunha sesión de control no Parlamento con acusacións cruzadas de "bulos" e "mentiras", Rueda volveu facer de menos as mobilizacións contra Altri, desdeñando a falta de "licenza social" que tería o proxecto, en referencia ás declaracións da plataforma Ulloa Viva na manifestación do pasado sábado na Pobra.

Para o presidente da Xunta, o debate non é medioambiental nin social xa. "O debate é se en Galicia queremos postos de traballo e investimentos" que, dixo, se non acaban aquí "irán a outro lado". Iso si, aclarou, sendo "especialmente esixentes" desde a Administración autonómica tanto con Altri como co resto de empresas que queiran instalarse no país, que son moitas pola "seguridade xurídica" que o Goberno galego achega, insistiu. 

"Por iso queren vir a Galicia e vostedes queren que non veñan", espetou aos líderes da oposición, a nacionalista Ana Pontón e o socialista José Ramón Gómez Besteiro. Un e outro lembráronlle a "histórica manifestación" da fin de semana na Pobra e a portavoz so BNG recriminoulle que a súa resposta e a do PP fose chamar a xente mobilizada "alborotadores e propagadores de bulos" ou acusala de "estar desinformados e manipulados". "A súa resposta é o desprezo e o insulto", dixo. 

Pontón pide a Rueda que "non converta Galicia nun grande eucaliptal" e lembrou os tráxicos incendios de Portugal en 2017

Pontón volveu cargar contra a "bomba ambiental" que di que suporía Altri e volveu preguntar a Rueda que por que, sendo Altri "unha empresa portuguesa", Portugal "non quere" a planta que si prevé en Palas. Ademais, pediu ao presidente da Xunta que "non converta Galicia nun grande eucaliptal" e lembrou que o país veciño prohibiu a plantación de eucaliptos tras os tráxicos incendios de 2017. "A partir de aí, Galiza convértese no lugar onde buscan os eucaliptos que alí non poden plantar", dixo. 

Pola súa banda, o secretario xeral do PSdeG, José Ramón Gómez Besteiro, lembrou a Rueda outros "proxectos frustrados" como "a fusión das caixas ou os centos de floteis de Pemex" e advertiu que "Galicia non precisa un proxecto que dedique máis masa forestal a producir celulosa". Imaxe     close    delete_forever swap_vert 

"Se do PSdeG dependese, este proxecto recibiría cero euros de fondos públicos porque nin cumpre nin o merece", asegura Besteiro

"Se do PSdeG dependese, este proxecto recibiría cero euros de fondos públicos porque nin cumpre nin o merece", dixo en dúas ocasións Besteiro, que asegura que a súa conclusión e a do seu partido xorden de "analizar a cuestión medioambiental e económica, a valoración social e o futuro e o emprego que xeraría Altri". "Facendo esta análise desde marzo pasado, cando se empezou a descubrir a verdade e que de fibra téxtil pouco e de celulosa moito", aclarou o líder socialista. "Eu son libre para decir isto, que non hai futuro nin valor engadido" na planta de Altri, insistiu. 

Respondía así Besteiro a Rueda, que acusou a BNG e PSdeG de "cambiar de opinión" sobre Altri e de telo apoiado ata antes das eleccións sabendo de sobre a que se dedicaría. "Pelexaban por apuntarse o tanto e que se instalase nos seus concellos; pelexaban por inaugurala e agora por derrubala", dixo o presidente da Xunta, tirando de hemeroteca e declaracións de apoio de líderes socialistas e nacionalistas. 

"Ou son ineptos, ou mentireiros ou non se enteran de nada ou todo á vez", chegou a dicir Rueda, mentres Pontón e Besteiro retrucaban con outra hemeroteca na que o ex-presidente da Xunta, Núñez Feijóo destacaba o proxecto por centrarse en "fibras téxtiles". "Enganaron a cidadanía ata que pasaron as eleccións, vostede coidouse moito de non dicir o que era, unha macrocelulosa", lembroullle a líder nacionalista ao xefe do Executivo galego. 

Rueda acusa a oposición de "cambiar de opinión" sobre Altri tras as eleccións; Pontón e Besteiro lembran que a Xunta sempre falou de fábrica de "fibras téxtiles" cando é "unha macrocelulosa"

"Quere unha nova Ence e iso non é futuro", acusou Pontón, que instou a Rueda a "apoiar a produción de alimentos, empresas tecnolóxicas...". "Non faga de comercial dunha macrocelulosa", engadiu, mentres Besteiro retou o presidente da Xunta a "recoller algunha declaración miña en sede parlamentaria ou no diario de sesións onde atope esa contradición". "Falamos de solvencia, de rigor e de se Altri achega valor engadido", insistiu o líder do PSdeG, que advertiu de "proxectos marabillosos" que si cumpren con esas condicións e "xeran máis emprego". 

"Vostede está atado a este proxecto e non é libre", insistiulle Besteiro, que cre que "Altri é unha gran mentira desde o primeiro día". "Non hai unha soa verdade sostible arredor del", engadiu. 

Por último, Rueda pediu que cesen "os boicots, as coaccións e as descualificacións" sobre Altri, así como "respecto" aos técnicos que lle outorgaron o visto e prace ambiental. "O importante non é o que di unha pancarta", rematou. 

Presenza de alcaldes e cargos do PP da zona

A sesión de control foi seguida desde a tribuna por máis de vinte dirixentes do PPdeG, portavoces e alcaldes de municipios da comarca onde se instalaría Altri ou da conca do Ulla. Entre eles, Pablo Taboada, rexedor de Palas de Rei. Ao finalizar o acto, Rueda, o conselleiro e presidente do PP provincial, Diego Calvo; e a secretaria xeral do partido, Paula Prado, acudiron a saudalos.