O presidente di que os últimos orzamentos veñen rexistrando "récords" de investimentos en atención primaria e considera que en materia de persoal "o Goberno central ten moito que facer e non o está facendo".
O pasado xoves o Consello de Contas, ente independente fiscalizador das administracións galegas, fixo público un informe específico sobre a atención primaria do Sergas. O documento sinala, entre outras cuestións, que a Xunta lle dedica o 12% do gasto sanitario, por baixo do 14% da media estatal e moi por baixo do 25% recomendado pola Organización Mundial da Saúde (OMS). Tamén sinala a falta de profesionais, especialmente pediatras, con 120 concellos que carecen desa figura.
Sobre as conclusións dese informe foi preguntado este luns o presidente Rueda, que minimizou o documento e deitou parte da responsabilidade no Goberno de España encabezado por Pedro Sánchez.
Rueda comezou a súa valoración salientando que a auditoría de contas "refírese ao ano 2023" e facendo ver que nos últimos tres anos o seu Goberno mellorou a atención primaria. "Di que fai falta máis investimento, e estamos de acordo, por iso estamos a incrementalo estes anos", valorou o presidente, que asegurou que nos últimos anos os Orzamentos da Xunta viñeron rexistrando sucesivos "récords" na atención primaria.
O presidente tamén salientou como segundo elemento do informe de Contas "que faltan máis médicos", ao que respondeu que "na parte que podemos, estamos a desenvolver todas as nosas capacidades". Porén, Rueda considera que "o Goberno central ten moito que facer e non o está facendo".
O presidente, pola contra, desbotou pronunciarse sobre outro informe coñecido nos últimos días, do Instituto Galego de Estatística, que constata a progresiva redución do número de camas hospitalarias dispoñibles. Rueda dixo non coñecer os datos e evitou valoralos.
