O goberno de António Costa presenta o seu deseño de alta velocidade entre Lisboa e o Miño co obxectivo de contratar en 2025 conxuntamente os proxectos e as obras
O primeiro ministro portugués, o socialista António Costa, presidiu este mércores no Porto un acto ao que o seu goberno deu certa solemnidade no que presentou as súas previsións para o desenvolvemento dunha liña de alta velocidade ferroviaria entre Lisboa, Porto e o río Miño. O obxectivo declarado é que en 2030 as viaxes en tren entre Porto e Vigo duren unha hora, fronte ás preto de dúas horas e media actuais ou á hora e media do coche particular. Será fundamentalmente grazas a un investimento duns 1.200 millóns de euros entre Braga e a fronteira, nun treito que o propio goberno luso admite que está “dependente de articulação com Espanha”, que segue sen concretar o trazado e previsións do treito entre Vigo e o Miño.
Por outra banda, o Goberno portugués sitúa o aeroporto Sá Carneiro do Porto como o eixo de desenvolvemento e rendibilización da nova liña ferroviaria e asegura que traballa co obxectivo de que tras as sucesivas fases de construción A Coruña quede a 2 horas e 23 minutos desa terminal aérea.
A planificación presentada este mércores polo Goberno portugués [aquí o PDF] vén derivada do programa de investimentos ata 2030 que lanzou hai un par de anos e está enmarcado no denominado Plano Nacional Ferroviario. Ademais, conta co apoio expreso da Comisión Europea como un dos proxectos transfronteirizos que quere financiar e, segundo Costa, a situación das finanzas lusas permitirá agora acometelo “sem sobressaltos”.
Segundo o detallado este mércores, a intención do Goberno portugués é acometer a nova conexión entre Porto e o Miño en dúas fases. Unha primeira incluiría a conexión entre Porto e o aeroporto Sá Carneiro e unha nova liña de vía dobre e alta velocidade en ancho ibérico entre Braga e a fronteira de Valença, actuacións que superarían os 1.200 millóns de euros. En 2023 realizaríanse estudos, en 2024 a avaliación ambiental e en 2025 sería o concurso para realizar á vez o proxecto construtivo e a obra, que comezarían a executarse en 2026 para estar rematada a liña en 2030. Nunha segunda fase actuaríase entre o Sá Carneiro e Braga, onde actualmente xa hai unha liña de prestacións mellores que a que hai entre Braga e a fronteira.
Na estratexia de situar o aeroporto Sá Carneiro como centro de interese da nova liña o Goberno luso chega a dar a estimación de 48 minutos para as viaxes desde alí ata Vigo e de 2 horas e 23 minutos ata A Coruña
As previsións son que a primeira fase, a que remataría en 2030, permita reducir o recorrido entre Porto e Vigo a unha hora, e que a segunda fase o reduza noutros dez minutos máis. Na estratexia de situar o Sá Carneiro como centro de interese da nova liña, o Goberno luso chega a dar as estimacións de 48 minutos de duración para as viaxes desde o aeroporto a Vigo na segunda fase e de 3 horas ata A Coruña na primeira fase e 2 horas e 23 minutos na segunda fase, tempos que implicarían a construción dunha saída sur subterránea de Vigo cara ao Porriño que España aínda segue a estudar.
De Lisboa ao Porto a nova liña reduciría das tres horas actuais a unha hora e 19 minutos a duración das viaxes en 2030
Este mércores tamén se presentou a planificación para a liña Porto-Lisboa, que se realizaría en tres fases. A primeira, duns 150 quilómetros entre Porto e Soure, ao sur de Coímbra, estaría rematada en 2028. A segunda, doutros 150 quilómetros entre Soure e Carregado, nas proximidades da área metropolitana de Lisboa, remataríase en 2030. E por último unha terceira fase de menor relevancia, entre Carregado e Lisboa, acometeríase a partir de 2030.
Segundo o Goberno portugués, se actualmente o tren entre Porto e Lisboa tarda algo máis de 3 horas en facer algo máis de 300 quilómetros, o remate da primeira fase en 2028 rebaixaría o tempo a dúas horas, e o remate da segunda fase en 2030 a unha hora e 19 minutos, para deixalo finalmente nunha hora e 15 minutos ao remate de todas as fases.
"Esta é a ligação entre Portugal e Espanha com maior procura", di o ministro das Infraestruturas sobre a liña con Galicia, da que engade que "o Aeroporto Sá Carneiro já é o aeroporto de referência para todo o Noroeste"
Segundo salientou o ministro das Infraestruturas portugués, Pedro Nuno Santos, en referencia á liña con Galicia, “sabemos, e isso é suportado pelos estudos, que esta é a ligação entre Portugal e Espanha com maior procura. Sabemos que é aqui que os povos que vivem de ambos os lados da fronteira têm as ligações sociais, económicas e culturais mais estreitas. Sabemos que o Aeroporto Sá Carneiro já é o aeroporto de referência para todo o Noroeste da península e, assim, com as novas ligações mais rápidas para Norte e para Sul, também contribuímos para alargar a sua área de influência».
