O PP de Feijóo tenta frear o galego e a linguaxe inclusiva na lei de atención á clientela

Diversas empresas teñen servizos de atención á clientela a través de centrais telefónicas CC-BY DC Studio / Freepik

Hemeroteca

A norma obrigará a atender en calquera das linguas oficiais ás empresas que dirixan os seus servizos ás autonomías atinxidas por esa oficialidade, pero os populares buscan que só sexa obrigatorio se as compañías están instaladas nelas

A lei de servizos de atención á clientela está en pleno trámite parlamentario nas Cortes. O pasado día 13 o proxecto recibiu o visto e prace no Congreso e pasou ao Senado, onde os diferentes grupos teñen a posibilidade de formular emendas a a un texto que, entre outros moitos aspectos, frea as chamadas telefónicas comerciais non consentidas ou limita os gastos de xestión "ocultos" ao mercar entradas ou billetes. 

Entre as novidades incorporadas ao texto durante o trámite parlamentario figura asegurar que, ao recibir consultas, queixas ou reclamacións, as empresas que teñan o servizo de atención á clientela "dirixido" a autonomías con máis dun idioma oficial, teñan que "asegurar" a atención en "calquera" deses idiomas. No caso da clientela de Galicia, daquela, esas compañías terán que atendela indistintamente en galego ou castelán.

Emendas do PP á lei de servizos á clientela no Senado CC-BY-NC-SA Praza.gal

A dirección estatal do PP tenta frear este precepto acoutándoo dende o Senado. Así, nunha das súas emendas, limitan a "obriga de prestar a atención ao cliente nas linguas cooficiais" -en referencia aos idiomas oficiais distintos do castelán- "exclusivamente para as empresas que teñan a súa sede, establecemento, delegación ou centro de prestación de servizos situado no territorio da comunidade autónoma" que corresponda. 

Carme da Silva reivindica "o respecto aos dereitos lingüísticos" como unha das achegas do Bloque á lei e censura que o PP tente "negar o dereito da cidadanía a ser atendida en galego"

Ademais, o PP que a presentación de queixas ou reclamacións "en linguas cooficiais" -distintas do castelán- "só sexa esixible cando a relación de atención ao cliente se produza dentro do territorio da correspondente comunidade autónoma con lingua oficial". Daquela, empresas que presten servizos en Galicia ou a clientela galegofalante pero non teñan a súa sede en territorio galego poderían continuar negándose a atender en galego.

Estas emendas do PP chamaron a atención da senadora do BNG, Carme da Silva, que reivindica como "unha das achegas" do Bloque a este proxecto no Congreso a "incorporación do respecto aos dereitos lingüísticos da cidadanía". Co texto aprobado, resalta, as compañías tamén "deben asegurar que os servizos de atención á clientela dispoñan dos medios humanos, técnicos e organizativos para garantir o uso das linguas oficiais do Estado, sexa cal for o modo en que se preste o servizo".

Carme da Silva, senadora do BNG, nunha intervención no pleno da Cámara Alta CC-BY-NC-SA BNG

Con esta "declaración de intencións", censura Da Silva, "o PP pretende negar o dereito da cidadanía a ser atendida en galego" porque "non queren admitir que o Estado é plurinacional e plurilingüe". No rexistro da súa emenda, o Grupo Popular xustifícaa como unha "mellora técnica".

Contra a linguaxe inclusiva: "cliente" no canto de "clientela"

O PP presenta como "mellora técnica" eliminar a linguaxe inclusiva de todo o texto da lei, que se refire a "clientela" ou "persoas consumidoras e usuarias"

Tamén critica Da Silva outras das emendas lingüísticas do PP á lei, referidas neste caso ao conxunto do texto. Tamén coa xustificación de "mellora técnica", os populares reclaman escribir "o cliente" en todas as mencións que a norma fai á "clientela"; o mesmo sucede con "persoas consumidoras", que promove remudar por "consumidores" e con "persoas consumidoras e usuarias", ás que reclama referirse como "consumidores e usuarios".

A senadora do Bloque lamenta que os conservadores pretendan "eliminar toda referencia á linguaxe inclusiva" para, co emprego do masculino xenérico, "incumprir a lei de igualdade". "É unha actitude involucionista e machista", coida. O PP ten garantida a aprobación das súas emendas no Senado, onde goza de maioría absoluta, pero non no Congreso, onde a lei ten que regresar antes de ser aprobada definitivamente.

Despece

  • Novo "non" a deixar de restrinxir os idiomas oficiais distintos ao castelán na Cámara Alta

    Co gallo da creación da refundación do Consello Xeral das Linguas Oficiais do Estado, o Grupo Socialista do Senado trasladou á Comisión Xeral das Comunidades Autónomas do Senado un novo intento de estender á Cámara Alta a fin das restricións ao galego, o catalán e o éuscaro que rexe dende esta lexislatura no Congreso. Pero a proposta bateu co "non" do PP.

    "O bloqueo de PP e Vox" a estender o uso de galego, catalán e éuscaro no Senado "non representa a España real nin o espírito de convivencia", lamenta a socialista Carmela Silva

    A moción, defendida pola viguesa Carmela Silva, chamaba a "animar as diferentes comunidades autónomas a seguir profundado nos seus territorios" na "difusión" dos idiomas oficiais e, ao tempo, "apoiar toda iniciativa que busque intensificar o seu uso no traballo parlamentario no Senado". Dende 2010, esta Cámara permite empregalas nalgunhas actividades como debates de mocións e nesta Comisión Xeral das Comunidades Autónomas, pero non en todo caso como no Congreso na actulidade.

    Carmela Silva, intervindo no Senado CC-BY-NC-SA PSdeG

    "O PP é incapaz de entender que as linguas cooficiais nos pertencen a todos e todas e que as temos que protexer e usar, sobre todo, no Senado" como "cámara territorial", sinalou Silva. A xuízo da senadora do PSdeG, "non hai nada máis patriótico que defender os dereitos lingüísticos da xente do noso país" e o "bloqueo de PP e Vox" ao seu avance no Senado" é "unha postura que non representa a España real nin o espírito de convivencia".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza