A Asociación Cultural Memoria Histórica Democrática de Ferrol e a Comisión pola Recuperación da Memoria Histórica da Coruña denuncian o posible "traslado a Madrid" dos fondos documentais que custodia o Arquivo Intermedio Militar Noroeste de Ferrol
A Asociación Cultural Memoria Histórica Democrática de Ferrol e a Comisión pola Recuperación da Memoria Histórica da Coruña denuncian o posible "traslado a Madrid" dos fondos documentais que custodia o Arquivo Intermedio Militar Noroeste de Ferrol. As dúas entidades demandan conxuntamente ao Ministerio de Defensa "o mantemento dos fondos en Ferrol" e a dixitalización documental "que facilite o acceso a investigadoras e investigadores interesadas no coñecemento histórico, nomeadamente aquelas causas e documentos sobre a represión franquista".
Nos últimos días as dúas asociacións foron alertadas da chegada ás instalacións militares en Ferrol dunha empresa de mudanzas, supostamente co encargo da Subdirección Xeral de Publicacións e Patrimonio Cultural do Ministerio de Defensa de levar a cabo un orzamento do traslado a Madrid dos fondos documentais dos tribunais militares da rexión noroeste, custodiados Arquivo Intermedio Militar Noroeste de Ferrol. Os fondos suman ao redor de dez mil caixas de documentación, polo que a empresa de mudanza tería preguntado pola posibilidade de acceder ao recinto con camións de gran tamaño.
As dúas asociacións foron alertadas da chegada dunha empresa de mudanzas, supostamente co encargo da Subdirección Xeral de Publicacións e Patrimonio Cultural do Ministerio de Defensa de levar a cabo un orzamento do traslado a Madrid dos fondos
Despois de ter coñecemento da operación, as dúas entidades memorialistas demandan o mantemento dos fondos en Ferrol "e que en todo caso se dixitalice a documentación e sexa accesible de acordo co establecido ao respecto do dereito de acceso e consulta dos documentos de arquivo sobre o Golpe de estado, a Guerra Civil e a ditadura que garante o dereito ao acceso libre, gratuito e universal aos arquivos públicos e privados".
La Voz de Galicia requiriu do Ministerio de Defensa e da Dirección do Arquivo Militar de Ferrol unha confirmación dos posibles plans de traslado, que nin confirmaron nin desmentiron a posibilidade.
As dúas asociacións, que se fan eco da "fonda preocupación e rexeitamento do mundo historiográfico e das investigadoras e investigadores galegos diante desta posibilidade de traslado", lembran a importancia que este arquivo tivo "para fornecer investigacións sobre a represión en todo o territorio galego como o proxecto Nomes e Voces". Lembran, igualmente, "que boa parte dos fondos documentais presentados no xuizo sobre a recuperación ao patrimonio público do Pazo de Meirás saíron deste arquivo".
As dúas entidades memorialistas demandan o mantemento dos fondos en Ferrol "e que en todo caso se dixitalice a documentación" e lembran a importancia que este arquivo tivo "para fornecer investigacións sobre a represión en todo o territorio galego"
Para as dúas entidades, "resulta sorprendente e incomprensible" que "se considere o traslado a Madrid" das "sentenzas de penas de morte e outras condenas que se ditaron por tribunais militares ilexítimos, que forman parte da memoria da represión franquista", alegándose "simplemente" a "gran demanda de consulta destes fondos" por parte de investigadores do resto do Estado.
A Asociación Cultural Memoria Histórica Democrática de Ferrol e a Comisión pola Recuperación da Memoria Histórica da Coruña solicitan das institucións, partidos políticos e entidades sociais e culturais galegas "a demanda do mantemento destes fondos no Arquivo Militar de Ferrol".
