O Tribunal Militar da Coruña considérao culpable dun delito de abuso de autoridade na modalidade de acoso sexual e condénao a seis meses de cadea e suspensión de emprego
O Tribunal Militar Territorial da Coruña vén de facer pública unha sentenza que condena un brigada da Garda Civil de Monforte por un delito de abuso de autoridade na súa modalidade de acoso sexual por enviar mensaxes de contido sexual a unha subordinada a través de WhatsApp. O axente é condenado a seis meses de cadea e suspensión militar de emprego durante ese mesmo tempo así como a indemnizar a vítima con 4.170 euros. A sentenza declara a responsabilidade subsidiaria do Estado no pagamento da indemnización por sucederen os feitos en acto de servizo.
Segundo os feitos probados da sentenza, en febreiro de 2023, estando condenado e vítima no seu posto de traballo na plana maior da compañía da Garda Civil en Monforte de Lemos, o brigada enviou á axente dúas mensaxes distintas de contido sexual. A primeira, a primeira hora da mañá, dunha "persoa espida sobre outra" a semellanza do coñecido home de Vitrubio de Leonardo da Vinci que o tribunal considera "un meme" para "facer un requirimento de relación sexual" ao que a axente contestou que non lle mandase "guarradas".
Tres horas máis tarde o brigada enviou unha segunda mensaxe cun vídeo no que "aparece unha muller berrando mentres é penetrada violentamente por un home co seu pene". Unha "montaxe de vídeo cunha relación sexual explícita pornográfica" que segundo o tribunal "tivo a aptitude para provocar" na vítima "unha situación obxectiva e gravemente intimidatoria, hostil ou humillante".
A sentenza establece tamén a responsabilidade subsidiaria do Estado por estaren os dous implicados en acto de servizo
A sentenza considera que "nos atopamos cunha proposición ou insinuación sexual efectuada por un brigada da Garda Civil respecto a unha garda civil, subordinada directa, conduta que se leva a cabo en horario laboral, mentres se atopan desempeñando as súas funcións". Unha "conduta claramente atentatoria á dignidade e liberdade sexual da garda civil" que o tribunal considera delito de abuso de autoridade na modalidade de acoso sexual.
Como os feitos se produciron "entre militares, no transcurso do desempeño de actos de servizo", a sentenza declara "a responsabilidade civil subsidiaria do Estado" para o pago da indemnización á vítima. Unha sentenza contra a que se pode interpoñer recurso de casación ante a Sala Militar do Tribunal Supremo.
