Feijóo di que a medida está pendente de que as consellerías de Educación e Sanidade acorden o protocolo e anuncia que o vindeiro mércores 19 de xaneiro comeza a vacinación coa terceira dose das persoas de 39 ou menos anos

A Xunta anunciou este xoves a súa intención de repartir probas de detección da COVID-19 na saliva nas aulas nas que se detecten casos positivos. O alumnado recibirá a proba nas aulas cando o centro sexa coñecedor do caso positivo e deberá facela na casa na mañá do día seguinte -as probas de saliva teñen a recomendación de realizarse pola mañá- antes de acudir de novo ao centro para xa non facelo no caso de resultar positiva.

Segundo indicou o presidente Feijóo, a medida está pendente de que as consellerías de Educación e Sanidade acorden o protocolo concreto de aplicación. Serán, dixo Feijóo, uns 50.000 test de saliva “para intentar diminuír as interaccións nas aulas”.

O presidente tamén anunciou este xoves que o vindeiro mércores 19 de xaneiro comezará en Galicia a vacinación coa terceira dose das persoas de 39 anos ou menos, de xeito progresivo e decrecente, unha vez que esta semana se dará por rematada a das persoas maiores de 40 anos. A medida chega despois de que o Consello Interterritorial de Saúde decidise este mesmo xoves estender a dose de reforzo da vacina a toda a poboación maior de 18 anos e que o intervalo para a súa aplicación sexa de cinco meses desde a segunda.

Galicia tamén pasará a tramitar a alta automática aos sete días de xeito simultáneo á baixa das persoas positivas por COVID pero sen síntomas

Igualmente, Feijóo confirmou que Galicia tamén pasará a tramitar a alta automática aos sete días de xeito simultáneo á baixa das persoas positivas por COVID pero sen síntomas. Isto é, se ata agora a alta debía ser confirmada aos sete días, agora no mesmo momento en que unha persoa sen síntomas reciba a baixa por dar positivo por COVID terá de xeito automático fixada a data de alta sete días máis tarde. Se nese tempo a persoa desenvolvese síntomas sería cando ela tería que poñerse en contacto co sistema sanitario para que este decidise sobre a prórroga desa baixa. 

Por outra banda, o Consello Interterritorial tamén fixou este xoves que os test de antíxeno da COVID non poderán ser vendidos ao público por máis de 2,94 euros. A orde publicarase no BOE mañá e estará en vigor o sábado.