No que levamos de ano os prezos dos alugueiros incrementáronse moi por riba da inflación, cun aumento do 6% no conxunto de Galicia, que chega a ser do 7,64% nas vilas entre 20 e 50 mil habitantes

Os alugueiros están a disparar os seus prezos nos últimos meses. Sábeno os e as estudantes universitarias que buscaron piso este verán ou seguen a buscar. Tamén as persoas ou familias que procuraron unha vivenda nos últimos tempos. O custo medio ao dun alugueiro superou en agosto os 500 euros no conxunto de Galicia, segundo os datos que ofrece o Observatorio da Vivenda da Galicia da Xunta a partir dos novos contratos asinados e fianzas depositadas.

Na maior parte das cidades os prezos dos novos contratos son aínda superiores, superando os 600 euros na Coruña (613,5) e rozando esa cifra en Vigo (590). Pontevedra (570,6) e Santiago (554,5) tamén se sitúan moi por riba da media galega.

No último ano e medio, o custo dos alugueiros medrou un 11,6% nas sete cidades galegas e o 14,19% nas grandes vilas. Na cidade da Coruña o aumento dos prezos supera o 15% e en Santiago pasa do 14,5%.

No que levamos de ano os prezos dos alugueiros incrementáronse moi por riba da inflación, cun aumento do 6% no conxunto de Galicia, que chega a ser do 7,64% nas vilas entre 20 e 50 mil habitantes e que tamén supera o 6% na Coruña, Ferrol e Santiago. 

No último ano e medio, dende xaneiro de 2022, o custo dos alugueiros medrou un 11,6% nas sete cidades galegas e o 14,19% nas grandes vilas. Na cidade da Coruña o aumento dos prezos supera o 15% e en Santiago pasa do 14,5%.

O incremento dos prezos da vivenda é unha constante dende o ano 2015. Dende o 2017, os prezos dos alugueiros aumentaron un 37% na cidade da Coruña, un 33%  en Vigo, un 38% en Pontevedra e un 36%

O incremento dos prezos da vivenda é unha constante dende o ano 2015. Dende o 2017, os prezos dos alugueiros aumentaron un 37% na cidade da Coruña, un 33%  en Vigo, un 38% en Pontevedra e un 36%. As restantes urbes galegas presentan incrementos algo inferiores, pero semellantes, dende o 33% de Lugo ao 26% de Ourense ou o 29% de Ferrol. 

No ultimo ano e medio todas agás Ourense (+8,11%) aumentaron máis dun 10% os seus prezos, un encarecemento que é moi semellante nas grandes vilas, pero tamén nos concellos entre 5 e 20 mil habitantes (+10,59%) e mesmo nas localidades de menos de 5 mil habitantes (+8,58%).

O mercado de vivenda de alugueiro foi reducíndose nos últimos anos debido a varios motivos, entre eles o incremento dos pisos turísticos, a falta de rehabilitacións ou a ausencia de promocións de vivenda protexida

O certo é que o mercado de vivenda de alugueiro foi reducíndose nos últimos anos debido a varios motivos, entre eles o incremento dos pisos turísticos. As cifras actualizadas o 1 de xullo indican que no país funcionan legalmente case vinte mil establecementos deste tipo (19.663), un incremento do 15% dende xaneiro.

Esta falta de vivenda dispoñible para ser alugada, tanto nas zonas urbanas coma rurais, prodúcese mesmo a pesar da gran cantidade de pisos e casas deshabitadas. Porén, a realidade é que "o estado de conservación interior ou o mobiliario" de moitos destes inmobles "non é óptimo", como sinalaba FEGEIN. 

Á redución do mercado de alugueiro e á necesidade de obras de rehabilitación de gran parte das vivendas baleiras únese tamén o escaso número de novas vivendas protexidas, con cifras en mínimos históricos. Dende o ano 2020 rematáronse apenas 468, por riba dos valores acadados entre 2014 e 2019, pero moi lonxe dos indicadores previos a 2014

Aínda que os prezos da vivenda están a aumentar en case todo o territorio, son as cidades -e dentro delas, os barrios máis céntricos- os lugares con alugueiros máis caros

Aínda que os prezos da vivenda están a aumentar en case todo o territorio, son as cidades -e dentro delas, os barrios máis céntricos- os lugares con alugueiros máis caros. O indicador do Observatorio da Vivenda de Galicia amosa como o distrito 15004 da Coruña (entre a praia de Riazor e as prazas de Galicia e Lugo, incluíndo boa parte do Ensanche) é o barrio máis caro de Galicia, cun prezo medio de 799 euros. Nos primeiros lugares da lista atopamos outros barrios coruñeses, coma o distrito 15003 (A Pescadaría), o 15005 (Ensanche e Falperra) e 15001 (Cidade Vella), todos por riba dos 650 euros.

Sen chegar ao nivel de prezos dos barrios coruñeses, entre os distritos máis caros para alugar en Galicia están tamén varios vigueses, en concreto o 36203 (O Castro e Gran Vía), o 36201 (que abrangue as principais rúas do seu Ensanche, como Rosalía de Castro e García Barbón) e 36202 (que abrangue o Casco Vello).

Neste ano 2023, nestas primeiras posicións tamén comezan a aparecer barrios do centro de Santiago e Pontevedra. En Santiago destacan o Ensanche compostelán (15701) ou o distrito 15706 (Conxo, Avenida Barcelona...) ambos os dous ao redor dos 600 euros. No caso de Pontevedra os distritos máis caros son o 36003 e o 36001, que abrangue a maior parte do centro da cidade, cun alugueiro medio que se supera os 630 euros que o sitúa entre os dez máis caros de Galicia.

Lugo e Ferrol seguen a ser as cidades máis baratas para vivir, aínda que tamén rexistran incrementos importantes nos prezos dos seus alugueiros, especialmente nos seus barrios céntricos. Por exemplo, en Lugo o distrito 27002 (que inclúe a Avenida Ramón Ferreiro, a Ronda das Fontiñas e a Ronda de Fingoi) é xa o máis caro da cidade, cun aumento do 12% no último ano e do 33% dende o 2017. Supera mesmo ao distrito 27001 (no interior da muralla) e ao 27003 (Avenida da Coruña, A Milagrosa...).

O COAFGA sinala que os estudantes"gozan dos mesmos dereitos que calquera arrendatario e nada xustifica que os pisos que se alugan a este colectivo non cumpran os requisitos mínimos de habitabilidade, como ter humidades, descunchados, electrodomésticos con funcionamento deficiente e, mesmo, mobles rotos"

Este aumento de prezos coincide coa procura de pisos de alugueiros para moitos e moitas estudantes universitarias, que se atopan con inmobles caros e que, ademais, moitas veces non presentan condicións mínimas de habitabilidade. Isto foi denunciado hai uns días polo Colexio Oficial de Administradores de Fincas de Galicia, COAFGA, que lembrou que os pisos en alugueiro "deben ser aptos para o seu uso e reunir unhas condicións mínimas de habitabilidade" e "deben dispoñer de instalacións seguras e actualizadas de gas, electricidade e auga".

O COAFGA sinala que os estudantes"gozan dos mesmos dereitos que calquera arrendatario e nada xustifica que os pisos que se alugan a este colectivo non cumpran os requisitos mínimos de habitabilidade, como ter humidades, descunchados, electrodomésticos con funcionamento deficiente e, mesmo, mobles rotos".

Tamén indican que as fianzas que se piden para arrendar son precisamente para a reparación dos danos que se puidesen producir durante o tempo que o inmoble está alugado. Ante iso, os administradores recomendan aos mozos e mozas que coa firma do contrato de alugueiro esixan o certificado enerxético da vivenda e, despois de asinado, o xustificante de depositar a fianza no Instituto Galego de Vivenda e Solo.

Aumento dos prezos de venda da vivenda

Ademais dos prezos do alugueiro, nos últimos meses tamén están a aumentar de forma notable os prezos de venda de vivendas, tanto de inmobles novos coma de segunda man. Os últimos datos, correspondentes ao segundo trimestre do ano e feitos públicos esta semana polo INE, amosan que o custo das vivendas novas está a aumentar máis dun 10% en termos interanuais. Dende o cuarto trimestre do ano 2021 o encarecemento anual destes inmobles vén superando o 6%.

O custo das vivendas novas está a aumentar máis dun 10% en termos interanuais. Dende o ano 2015, ano que se toma como base, os prezos incrementáronse xa un 60%

Dende o ano 2015, ano que se toma como base, os prezos incrementáronse xa un 60%, amplamente por riba do máximo acadado xusto antes do estalido da burbulla inmobiliaria no ano 2008. Entre o 2009 e o 2013 os prezos de compra descenderon de forma importante, para volver subir dende entón.

En canto á vivenda de segunda man, o incremento dos prezos está a ser máis contido, pero acumula xa sete anos de ascensos trimestrais ininterrumpidos. No segundo trimestre deste ano 2023 o aumento foi tan só do 2%, o menor dende os primeiros meses de 2021. O prezo medio sitúase un 27% por riba do nivel do ano 2015, que se toma como base. En calquera caso, a cifra está aínda moi lonxe dos máximos acadados no ano 2007.