Galicia comezou o 2020 mantendo a mesma tendencia de descenso do número de nacementos dos anos anteriores. No primeiro semestre dun ano marcado pola pandemia de Covid-19 houbo 7.562 nacementos, por debaixo do dato dos seis primeiros meses do ano 2019 (7.739) e marcando, de feito, un novo mínimo histórico dende que existen rexistros.
No primeiro semestre do 2020 houbo 7.562 nacementos, por debaixo do dato dos seis primeiros meses do ano 2019 (7.739) e marcando un novo mínimo histórico
Aínda que o segundo semestre do ano adoita rexistrar unha cifra de nacementos lixeiramente inferior ao primeiro semestre, o dato dos primeiros meses do 2020 anticipa un novo récord negativo neste indicador, o que podería converter o conxunto do 2020 novamente no ano con menos nacementos da historia.
Segundo os datos publicados este martes polo INE, o número de nacementos en Galicia descendeu un 2,3% con respecto ao mesmo período do ano anterior, unha diminución que se sitúa por debaixo da rexistrada no conxunto do Estado español (-4,2%) e que superou o 6% en Madrid, Navarra ou Cantabria.
A Coruña e Lugo si tiveron no primeiro semestre do 2020 un maior número de nacementos que o pasado ano, fronte aos descensos de Ourense e, sobre todo, de Pontevedra
Por provincias, A Coruña e Lugo racharon esta tendencia e si tiveron no primeiro semestre deste ano un maior número de nacementos que o pasado ano, fronte aos descensos de Ourense e, sobre todo, de Pontevedra. A Coruña tivo 3.237 nacementos (fronte aos 3.213 do primeiro semestre de 2019), Pontevedra 2.762 (2.929), Lugo 862 (856) e Ourense 701 (717).
Os datos do INE recollen tamén os efectos do incrementos da mortalidade provocada pola Covid-19, especialmente en determinados territorios. O número de defuncións en Galicia pasou de 16.195 (primeiro semestre do 2019) a 16.518 (primeiro semestre do 2020), un aumento do 2%, moi por debaixo do incremento rexistrado no conxunto do Estado español (+19,6%), especialmente importante na Comunidade de Madrid (+64%), Castela-León (+46%), Castela-A Mancha (+28%) ou A Rioxa (+19%).
O número de defuncións en Galicia pasou de 16.195 (primeiro semestre do 2019) a 16.518 (primeiro semestre do 2020), un aumento do 2%
O descenso no número de nacementos en Galicia e o aumento no número de mortes fan que tamén se incremente o valor negativo do saldo vexetativo. Nos primeiros seis meses a diferenza entre nacementos e mortes foi de -8.956, por riba do -8.456 do primeiro semestre do pasado ano. Iso si, mentres que o pasado ano o saldo vexetativo galego foi o máis negativo de todo o Estado español, nos primeiros seis meses do 2020 a importante mortalidade provocada pola Covid-19 fai que os datos negativos da Comunidade de Madrid, Catalunya e Castela-León superen aos galegos.
A publicación dos datos coincidiu co debate e votación no Parlamento galego do ditame emitido pola Comisión de Sanidade, Política Social e Emprego sobre o Proxecto de lei de impulso demográfico de Galicia
A publicación dos últimos datos de nacementos e defuncións coincidiu este martes co debate e votación no Parlamento galego do ditame emitido pola Comisión de Sanidade, Política Social e Emprego sobre o Proxecto de lei de impulso demográfico de Galicia. Ademais, este mesmo martes o presidente da Xunta, Alberto Núñez Feijóo, e a conselleira de Política Social, Fabiola García, mantiveron unha xuntanza coa vicepresidenta para a Democracia e a Demografía da Comisión Europea, Dubravka Šuica, para presentarlle esta norma.
A Lei de Impulso Demográfico de Galicia foi presentada no verán do ano 2019 e dende entón recibiu críticas polo seu carácter xenérico e ausencia de medidas novas. O propio Consello Económico e Social (CES) subliñou o pasado ano a ausencia de medidas concretas no texto, sobre todo as referidas á promoción económica e xeración de emprego no medio rural ou ao apoio á fixación de poboación nova ou á chegada e retorno de poboación emigrante.
Os datos amosan a escasa ou nula incidencia das medidas postas en marcha nos últimos anos pola Xunta. Galicia tivo o pasado ano 4.000 nacementos menos que antes da posta en marcha do cheque-bebé
Independentemente do éxito ou fracaso da futura norma, a realidade dos últimos anos en Galicia amosa un descenso continuado do número de nacementos, con cifras que pasaron de superar os 20.000 entre 2003 e 2012 a situarse nos 15.718 o pasado ano. Só cinco concellos galegos teñen aínda máis nacementos que mortes e o pasado ano por primeira vez o número de persoas maiores de 65 anos duplicou o de menores de 15.
Así mesmo, a porcentaxe de nacementos con nais maiores de 40 anos en Galicia é a maior de toda a Unión Europea. Os datos amosan a escasa ou nula incidencia das medidas postas en marcha nos últimos anos polo Goberno galego pois, por exemplo, Galicia tivo o pasado ano 4.000 nacementos menos que antes da posta en marcha do cheque-bebé da Xunta.