O Colexio de Traballo Social acusa a Xunta de fomentar o "intrusismo laboral" descargando no profesorado funcións que non lle corresponden

Presentación do Plan Recupera a cargo do conselleiro de Educación, Román Rodríguez © Xoán Crespo / Xunta

Hemeroteca

O COTSG eleva a crítica pública á actuación do Goberno galego, nun comunicado no que subliña que se necesita persoal cunha formación especializada no seguimento ao "alumnado con maiores dificultades, tanto educativas como familiares"

O pasado mes de xuño a Consellaría de Educación presentou a Rede de Acompañamento e Orientación persoal e familiar de Galicia no marco do Plan Recupera. "O obxectivo desta rede -sinalaba daquela o conselleiro Román Rodríguez- será desenvolver actuacións de seguimento ao alumnado con maiores dificultades, tanto desde o punto de vista educativo como familiar". Un total de 32 docentes compoñen esta rede, atendendo as necesidades de reforzo do alumnado doutras tantas zonas. Cada un destes docentes é responsable dunha Unidade de Acompañamento e Orientación persoal e familiar (UACO).

Dende a presentación destas unidades o Colexio Oficial de Traballo Social de Galicia (COTSG) amosouse crítica coa súa formulación, alertando de que no seu funcionamento se estaba a producir un "intrusismo laboral", descargando sobre os docentes labores que son propias de profesionais especializadas en Traballo social. 

Acción do Colexio Oficial de Traballo Social de Galicia, nunha imaxe de arquivo © COTSG

Agora o COTSG eleva a crítica pública á actuación do Goberno galego, nun comunicado no que subliña que se necesita persoal cunha formación especializada nesta cuestión "para a procura de solucións integrais ás situacións complexas que se pretenden abordar no eido educativo a través da Rede Galega de Acompañamento e Orientación persoal e familiar". A entidade sinala que o profesorado "non pode nin debe asumir estas funcións, dado que non conta nin coa formación nin coas ferramentas necesarias para levalas a cabo". 

A entidade sinala que o profesorado "non pode nin debe asumir estas funcións, dado que non conta nin coa formación nin coas ferramentas necesarias para levalas a cabo"

O Colexio destaca que as funcións indicadas na Resolución do 14 de xuño de 2021 da Secretaría Xeral de Educación e Formación Profesional "nada teñen que ver coas levadas a cabo polo profesorado, senon que describen de maneira contundente as que levan a cabo os e as profesionais do Traballo Social tanto no sistema escolar como tamén en Servizos Sociais". "Todo isto pode dar lugar a situacións de intrusismo laboral, entendido este como o exercicio dunhas funcións sin contar coa titulación ou ferramentas necesarias", conclúe.

O obxectivo principal destas unidades é o de facer o seguimento individualizado do alumnado mais vulnerable educativamente e colaborar coas súas familias e a súa contorna, ademais de actuar como canle de comunicación directa entre centros educativos, familias, administracións e outras entidades, tendo en conta a singularidade do alumnado das zonas rurais.

O COTSG reivindica a figura do Traballo Social Escolar

O COTSG, que reivindica a figura do Traballo Social Escolar, lembra que a atención e intervención social "prestada por profesionais non cualificadas a persoas especialmente vulnerables que requiren de unha atención integral trasnversal e con coñecementos especificos no ámbito, nunca podería acadar os parámetros mínimos de calidade". O Colexio solicita á Xunta a modificación desta Resolución e critica que "todas as veces que este organismo tentou abrir comunicación coa consellería foron improductivas".

Despece

  • CIG-Ensino e ANPAs Galegas acusan a Xunta de "mentir e manipular" cos datos de profesorado de reforzo no terceiro curso coa COVID

    Concentración da CIG-Ensino e ANPAs Galegas ante o complexo de San Caetano o 8 de setembro de 2021 CC-BY-NC-SA CIG-Ensino

    D.L.

    Na véspera do inicio do curso escolar 2021-22, a CIG-Ensino -sindicato maioritario entre o profesorado- e a Confederación ANPAs Galegas simbolizaron cunha concentración ante a sede da Consellería de Educación, no complexo administrativo de San Caetano, o seu rexeitamento ao que alcuman como "pandemia dos recortes". A relaxación das medidas fronte á COVID, sinalan, trae consigo unha redución de efectivos docentes que o departamento dirixido por Román Rodríguez, acusan, oculta mediante a "mentira e a manipulación".

    Evidencia Suso Bermello, secretario xeral da CIG-Ensino, que a redución das distancias de seguridade entre estudantes nas aulas a 1,2 metros en niveis como Secundaria e FP implica "menos desdobres e polo tanto, menos persoal docente". "A exposición ao coronavirus aumenta ao tempo que a calidade do ensino resulta mermada", censura.

    Suso Bermello, secretario xeral da CIG-Ensino: "Reiterar unha e outra vez que hai 1.250 contratacións para afrontar a COVID é falso, o primeiro porque non son a tempo completo"

    Todo isto, indica o dirixente sindical, sucede nun contexto de "ausencia total de transparencia" por parte de Educación. "Non hai ningún tipo de dato público que permita coñecer a diferenza entre o profesorado contratado a tempo completo este curso ao respecto do pasado", censura. Nese sentido, resalta que "reiterar unha e outra vez que hai 1.250 contratacións para afrontar a COVID é falso" porque "non son a tempo completo, senón a media xornada" e polo tanto, equivalen "a 625 postos de traballo reais". Ademais, censura, esas contratacións "son reforzos ordinarios" de plans que existían mesmo "antes da pandemia.

    "O que si sabemos -agrega Bermello- é que o curso comeza con 127 aulas pechadas, sobre todo no rural". Tamén, critica, "coa negativa autorizar desdobres no medio urbano", mesmo con aulas que contarán con 26 estudantes, superando o máximo de 25, "en contra do afirmado polo propio conselleiro", conclúe.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza