"Deberiamos ir na dirección contraria: reducir a superficie de eucalipto tal e como esixe o Plan Forestal Galego actualmente en vigor, avanzar cara á redución global da produción e o consumo de papel", destacan medio cento de entidades ambientais de cinco continentes
Cincuenta e dúas organizacións non gobernamentais ambientais de cinco continentes fan públicos os argumentos que remitiron por escrito ás consellerías de Medio Ambiente e Industria da Xunta, así como aos ministerios de Transición Ecolóxica e Industria, solicitando "a paralización definitiva do proxecto de fábrica de celulosa e fibras de eucalipto de Altri/Greenfiber en Palas de Rei.
As entidades chaman a atención sobre os impactos que provocaría na contorna natural da comarca da Ulloa na que se vai a situar a fábrica, na biodiversidade de espazos de gran valor, nas especies vulnerables e en perigo de extinción, no patrimonio cultural, nos sectores primarios locais, nos recursos hídricos e na saúde das persoas nun amplo radio de acción. Motivos polos que desaconsellan a implementación do proxecto de Altri e solicitan que se desestime definitivamente por parte das institucións públicas.
Este medio cento de entidades forma parte da Environmental Paper Network (EPN), unha rede internacional que naceu no ano 2002 co obxectivo común de camiñar cara a unha industria forestal, de pulpa e papel que contribúa a un futuro saudable, xusto e sostible para toda a vida na Terra.
Para cuestionar a viabilidade do proxecto de Altri, estas entidades –entre as que figuran Greenpeace, WWF, Zero, Amigas da Terra, Ecologistas en Acción e Fridays For Future– poñen o foco sobre o proceso de 'eucaliptización' que vén sufrindo tanto Galicia como a zona centro e norte de Portugal, un fenómeno que consideran "insólito en Europa".
Estas ONG de todo o mundo fan un chamado á Xunta e ao Goberno de España para que reaccionen de forma urxente e pública á súa petición para "parar dunha vez por todas" o proxecto de Altri
Na análise que detallan nas súas comunicacións coa Xunta e o Goberno de España aseguran que esta situación provocou unha "enorme perda de biodiversidade" e unha "importante deterioración da integridade ecolóxica" da rexión, "afectando radicalmente ás masas forestais autóctonas e a moitos outros hábitats de alto valor que necesitan conservación".
Na mesma liña, os asinantes tamén expresan as súas dúbidas sobre a efectividade das actuais moratorias a novas plantacións de eucalipto que existen en Galicia e Portugal, cuxo obxectivo debe ser limitar a súa expansión.
En definitiva, as ONG apuntan a que "o proxecto non reúne as condicións para seguir adiante nin para ser financiado con diñeiro público a través dos fondos europeos Next Generation, xa que é contrario aos obxectivos de sustentabilidade dos mesmos".
En concreto, denuncian as entidades, mentres que un dos obxectivos destes fondos europeos é "mellorar a calidade da auga dos nosos ríos e mares e reducir os residuos", o proxecto de Altri/Greenfiber "empeorará aínda máis a calidade da auga do río Ulla". Ademais de empeorar a "sobresaturación" da industria da pulpa e do papel nesta rexión. Para apoiar o seu escrito, as ONG empregan a información do propio proxecto, informes da Xunta e tamén o informe realizado por expertos de diferentes ámbitos para o Consello da Cultura Galega.
Inciden en que o proxecto de Altri "empeorará aínda máis a calidade da auga do río Ulla" e vai en contra dos obxectivos dos fondos Next Generation
"Deberiamos ir na dirección contraria: reducir a superficie de eucalipto tal e como esixe o Plan Forestal Galego actualmente en vigor, avanzar cara á redución global da produción e o consumo de papel, promover os envases reutilizables, maximizar o contido de fibra reciclada nos produtos papeleiros, incrementar o uso doutros materiais recuperados e acabar co uso de fibras procedentes de bosques e selvas ameazadas, ecosistemas e hábitats de alto valor en materia de conservación, tendendo a fabricar fibras de nova xeración e non a partir de madeira", conclúen na súa mensaxe aos gobernos.
Estas entidades ambientais de todo o mundo fan un chamado á Xunta e ao Goberno de España para que reaccionen de forma urxente e pública á súa petición para "parar dunha vez por todas" o proxecto da fábrica de celulosa e fibras que se pretende instalar en Palas de Rei con axudas públicas.
