A "precaución" é o motivo que alega a Xunta para incluír o peche dos centros de día nas medidas para conter os contaxios da COVID-19 na área sanitaria da Coruña e Cee . Case un mes despois de reabrir, estes centros de atención ás persoas maiores, que ademais contribúen á conciliación das familias, volven quedar parados durante un mínimo de cinco días e ata novo aviso da Xunta.
Olga Pedre, que dirixe un centro de día na Coruña, asegura que se soubo do peche pola prensa e que a comunicación de Política Social chegou o luns pola mañá
Olga Pedre, da Plataforma de Centros de Día de Galicia, conta desde A Coruña que no seu centro recibiron a nova deste peche "inesperado" na tarde do venres polos medios de comunicación, mentres que a comunicación oficial da Consellería de Política Social chegou este luns pola mañá.
"Non houbo ningún caso de Covid-19 nos centros de día de toda Galicia. Por que non se pechan os ximnasios, as cafeterías ou os grandes centros comerciais? Por que nos obrigaron a facer unha formación que non fixo ninguén para agora ser os primeiros e os únicos en pechar?", pregúntase Pedre.
"Seguimos sen dar crédito", sinala sobre a posición "totalmente discriminatoria" de Política Social desde que comezou a pandemia. "Agora temos que estar en contacto coas áreas sanitarias polo novo protocolo e recibimos un apoio total pola parte de Sanidade", afirma, "porque somos centros sociosanitarios e tamén facemos un labor esencial".
Critican que Galicia é o único territorio que non considera "esenciais" os centros de día e salientan que non se produciu ningún caso positivo de Covid-19 neles
"Galicia é a única Comunidade Autónoma que non considera como esenciais aos centros de día cando unha parte do noso traballo é axudar aos maiores coa súa hixiene diaria, coa alimentación e coa medicación", engade.
"Por que non se consideran servizos esenciais os centros de día? Esa é a pregunta, que alguén da Xunta nola responda", sinala Silvia Cal, membro da coordinadora da Plataforma de Centros de Día de Galicia, quen asegura que na "nova normalidade" se está a comprobar que todas as terapias cognitivas que levan a cabo teñen efectos positivos sobre as persoas maiores.
"Neste tempo todos vimos o que perderon e estamos intentando recuperar como estaban en marzo. Falamos da súa saúde en conxunto, tamén do seu estado anímico. Unha persoa que se move, por exemplo, mellora a circulación e así o funcionamento dos riles", explica Cal.
Pedre relata que o venres viviron "un drama total" cando lle comunicaron aos usuarios do centro o peche: "Os que non teñen deterioro cognitivo e ven todo o que está a pasar choraban porque quedan outra vez encerrados, moitos sen opcións e dependendo de bares para que lles leven a comida. Comentábannos cousas como 'para un ano ou dous que me quedan de vida, outra vez encerrados sen facer nada".
Alertas de "deterioro" das persoas atendidas nos centros
Desde a Plataforma de Centros de Día de Galicia veñen denunciando o "deterioro" das persoas maiores nos meses de confinamento e inciden en que o seu papel como vertebradores da atención á dependencia é "necesario".
"Non penso que estean máis protexidos, nin mellor, nas súas casas", asegura Silvia Cal, da coordinadora da Plataforma de Centros de Día de Galicia
O pasado 13 de marzo decretouse o peche de todos estes centros no país coa entrada en vigor do estado de alarma pola crise da Covid-19. Con todo, foron dos primeiros espazos en contar cos permisos para volver á actividade na fase 1 do plan de desconfinamento do Goberno estatal, que en Galicia comezou o 11 de maio.
"Entendemos cal é a situación da Coruña, pero seguimos pensando que se non se pecharon os negocios en xeral, e o ocio segue aberto ata a unha da mañá, os centros de día non deben pechar", resalta Silvia Cal. "Non penso que estean máis protexidos, nin mellor, nas súas casas", asevera.
Galicia foi o último territorio do Estado en reabrir os centros de día. A actividade retomouse o pasado 15 de xullo, tres días despois das eleccións, após varios anuncios por parte do Goberno da Xunta, que foi aumentando os requisitos e esixiu unha formación específica para o persoal criticada por ser "nada específica".
Galicia foi a última comunidade autónoma en reabrir os centros de día para maiores e persoas con discapacidade tras o confinamento
"Nos centros de toda Galicia estamos pendentes de ser o lugar máis seguro que se poida ter hoxe coa Covid-19", asegura Cal, quen detalla que contan cun "plan de acción" aprobado polo Sergas e co "asesoramento" dun médico en cada área sanitaria. Ademais, ningún centro de día está aínda ao 100% da súa capacidade e teñen divididos os espazos "por áreas de convivencia".
Neste contexto, Olga Pedre mostra o seu desconcerto por este peche na área da Coruña despois das "grandes inversións" que realizaron para "comprar mamparas e mesas individuais para garantir a distancia de seguridade". "O que van conseguir é que pechemos definitivamente. Cruz Vermella e Cáritas, con todo o apoio que teñen, xa o fixeron con todos os seus centros na Coruña", lamenta.
