Aena pide que se consulte coas compañías aéreas o estado de cada voo xa que a normalidade de saídas e chegadas aínda podería tardar en recuperarse por completo
A primeira hora da tarde deste domingo Aena, ente xestor dos aeroportos, informou de que o aeroporto de Peinador, en Vigo, “xa está operativo” tras pechar o venres pola mañá por unha fochanca na pista de aterraxe. Os traballos de reparación desenvolvéronse durante este domingo e, aínda que a terminal xa está operativa, Aena pide a pasaxeiros e pasaxeiras que consulten coas súas aeroliñas o estado de cada voo, xa que a normalidade de saídas e chegadas aínda podería tardar en recuperarse por completo.
O venres constatouse que o problema na pista, xa detectado previamente, fora a máis e decidiuse pechar o aeroporto. Desde ese momento víronse afectados ducias de voos e milleiros de pasaxeiros, con enlaces cancelados, realizados por estrada ou desviados a Santiago.
O sábado Aena agradeceu á empresa que se encargou da reparación da pista que malia as datas puxese en marcha as súas plantas de asfalto para poder realizar os traballos canto antes. E avanzou a súa esperanza en poder reabrir a terminal "a partir do luns". Pero finalmente os traballos aceleráronse e a primeira hora da tarde deste domingo xa se daba por rematada a reparación.
