A gala celebrada en Lugo tivo un marcado protagonismo feminino, co 70% dos premios profesionais para mulleres

Sirât, de Oliver Laxe, foi a mellor película galega de 2025, pero Antes de nós, de Ángeles Huerta, foi a que destacou en maior número de categorías, 13. Así o decidiron os XXIV Premios Mestre Mateo do audiovisual galego outorgados este sábado en Lugo. O filme de Laxe obtivo ademais do galardón a mellor película os de mellor música orixinal e mellor son mentres que o de Huerta igualou cos seus 13 premios o récord histórico obtido por Dhogs hai oito anos.

A esta XXIV edición dos Mestre Mateo chegaba Antes de nós, sobre a vida de Castelao, con candidaturas en 18 categorías, e finalmente só quedou sen lograr cinco. Por detrás, 11 candidaturas foron as que acadaron Sirât, de Oliver Laxe, e As liñas descontinuas, de Anxos Fazáns, que quedou sen ningún premio.

A gala celebrada en Lugo tivo como momentos máis singulares a entrega do premio a mellor interpretación masculina de reparto a Miquel Ínsua por Antes de nós, falecido hai uns meses. Outro dos momentos salientables foi a entrega do Premio de Honra á tradutora e asesora lingüística Rosa Moledo, en recoñecemento á súa traxectoria e contribución ao audiovisual galego. Ademais, a organización salientou o protagonismo feminino, xa que 11 dos 16 galardóns profesionais entregados foron recollidos por mulleres.

Palmarés

• Longametraxe: Sirât
• Dirección: Ángeles Huerta (Antes de nós)
• Dirección de arte: Elia Robles (Antes de nós)
• Dirección de fotografía: Lucía C. Pan (Antes de nós)
• Dirección de producción: Lucía Caramelo (Antes de nós)
• Guión: Pepe Coira (Antes de nós)

• Interpretación feminina protagonista: Cris Iglesias (Antes de nós)
• Interpretación feminina de reparto: ex-aequo Luisa Merelas e Victoria Teijeiro (Antes de nós)
• Interpretación masculina protagonista: Xoán Fórneas (Antes de nós)
• Interpretación masculina de reparto: Miquel Ínsua (Antes de nós)
• Maquillaxe e perruquería: Chicha Blanco e Lorena Calvo (Antes de nós)
• Montaxe: Lucía Iglesias (Antes de nós)
• Vestiario: Aránzazu Domínguez (Antes de nós)
• Música orixinal: Kangding Ray (Sirât)
• Son: Amanda Villavieja (Sirât)
• Realización: Marcos Nine (Historias de aquí)

• Documental: 360 curvas
• Curtametraxe: Curmán
• Curtametraxe de animación: O corpo de Cristo
• Anuncio publicitario: Ao noroeste do oeste
• Programa: Cos pés na terra
• Serie de TV: Weiss & Morales
• Serie web: Bechos
• Videoclip: Hibernarse (Fillas de Cassandra)
• Comunicador: Xosé Ramón Gayoso (Luar)