A Casa de Rosalía acolle este xoves a partir das 20 horas un acto no que participarán Xosé Manuel Beiras, Xosé Luís Axeitos, Chus Pato, Alexandra Cabana, Quique Alvarellos e Anxo Angueira e que rematará cunha actuación musical do Leo de Matamá
En 1976 Xosé Luís Méndez Ferrín publicou Con pólvora e magnolias, obra fundamental da poesía galega e que “fixo abanear os cimentos da poesía galega”, en palabras de Anxo Angueira, especialista na obra ferriniana e presidente da Fundación Rosalía de Castro. No 50 aniversario do poemario, a Casa de Rosalía acolle este xoves unha homenaxe a Ferrín na que participarán Xosé Manuel Beiras, Xosé Luís Axeitos, Chus Pato, Alexandra Cabana, Quique Alvarellos e Anxo Angueira.
O acto, que comezará ás oito da tarde, rematará cunha actuación musical do Leo de Matamá. Ademais, presentarase a edición facsimilar de Con pólvora e magnolias que vén de publicar Alvarellos editora.
A obra "que abriu un novo tempo para a poesía galega" consta de 22 poemas nos que se mestura o compromiso social e político marxista e nacionalista (a pólvora) e os textos intimistas, existencialistas e confesionais (as magnolias). Dende a súa publicación por Rompente en 1976, a obra -que recibiu o Premio da Crítica en 1977- significou unha revolución na literatura galega. Reimprimiuse en 1978 e reeditouse en oito ocasións, a máis destada a que realizou Xerais en 1989 con comentarios de Carmen Blanco e Claudio Rodríguez Fer.
Segundo Anxo Angueira, “o impacto do libro naquela encrucillada política e literaria de 1976 foi determinante na nosa cultura contemporánea. Todo foi distinto a partir de Con pólvora e magnolias, un libro distinto, no seu formato e no seu deseño, na súa concepción plástica e literaria”
"Supuxo unha pauta produtiva decisiva para evitar a asfisia do repertorio galego, tanto por reclamar espazos para o subxectivismo e a introspección como por inscribirse nun camiño crítico coa hipertrofia do socialrealismo formulado desde a vontade de inclusión desde os postulados ideolóxicos da poesía cívica e combativa", escribiu sobre ela Dolores Vilavedra.
Segundo Anxo Angueira, “o impacto do libro naquela encrucillada política e literaria de 1976 foi determinante na nosa cultura contemporánea. Todo foi distinto a partir de Con pólvora e magnolias, un libro distinto, no seu formato e no seu deseño, na súa concepción plástica e literaria”.
A obra consta de 22 poemas nos que se mestura o compromiso social e político marxista e nacionalista (a pólvora) e os textos intimistas, existencialistas e confesionais (as magnolias)
Aquel volume “fixo abanear os cimentos da poesía galega”, “era o libro homenaxe á propia tradición poética e literaria galega, era o libro diálogo coa cultura universal, era o libro un fervedoiro de lingua nova, unha columna dialéctica de río, unha morte revolucionaria de derrotas e crepúsculos”. E remata: “O libro tíñao todo para se converter nun referente poético daqueles anos, pero tamén para, como se erixiu, nun referente literario cuxa vixencia permanece hoxe cincuenta anos despois”.
Edición facsimilar
A edición facsimilar constitúe unha "réplica exacta" dunha "obra histórica, pola calidade e novidade da súa poesía, máis tamén polo seu singular formato e deseño"
Alvarellos editora presenta no 50 aniversario da obra unha edición facsimilar que constitúe unha "réplica exacta" dunha "obra histórica, pola calidade e novidade da súa poesía, máis tamén polo seu singular formato e deseño". A presente edición foi impresa en papel kraft, como o orixinal, e cun entapado manual, coas lapelas pegadas, tal e como fora presentada hai medio século. Inclúe un epílogo do especialista Anxo Angueira e a reprodución de manuscritos orixinais.
Impresa utilizando o mesmo tipo de papel kraft de cor marrón no interior e verxurado na cuberta, esta edición facsimilar é pois unha perfecta réplica da orixinal de 1976: no formato (18 x 20,2 cms), nas cores amarela escura da capa e na violeta para todos os textos, na tipografía, e mesmo foi reproducido o sistema de lapelas pegadas, mediante un entapado, feito un a un, de cada exemplar.
