Unha ducia de imaxes do espolio de Meirás
A agardada demanda da Avogacía do Estado para tentar a reversión do Pazo de Meirás ao patrimonio público pon o foco no xeito en que o ditador se fixo coa que fora residencia de Emilia Pardo Bazán. Documentación, prensa da época e imaxes na altura concibidas como propaganda do xeneral golpista retratan o que investigadores, asociacións da memoria histórica e agora tamén o Estado ven claro que foi un espolio
-
01
As 'doazóns'
Documentos coma este, recuperado pola asociación Cultura Aberta de Carral, acreditan o xeito en que foi executada a recadación de fondos entre a veciñanza por parte da denominada Junta Pro-Pazo
-
02
As primeiras visitas
Mesmo antes da súa entrega oficial ao ditador, a familia Franco xa tomara posesión oficialmente do Pazo. Así o amosa, por exemplo, esta publicación propagandística que eloxiaba unha visita ao recinto por parte de Carmen Polo, esposa do militar, no verán de 1938.
-
03
A entrega oficial
En decembro de 1938 Franco viaxou a Galicia para recibir oficialmente o agasallo. Así o recolleu, por exemplo, o xornal El Pueblo Gallego, cabeceira de marcado carácter galeguista que os golpistas interviñeran para tornalo pola forza nunha publicación franquista. Naquela visita Franco realizara toda caste de promesas, entre as que destacara "una pista" para viaxar da Coruña a Madrid "en cinco horas".
-
04
Roteiro triunfal
Unha colección de imaxes recentemente dixitalizada pola Biblioteca Nacional de España recolle impactantes imaxes da viaxe de Franco a Galicia en 1938 para quedar oficialmente con Meirás. É o caso deste grupo de mulleres e nenas na Praza de Praterías en Santiago, agardando o paso da comitiva.
-
05
Abrindo paso ao ditador
Naquela viaxe Franco quixo deixar claro o apoio da Igrexa á súa operación política e bélica para se facer co poder. Os gardas armados ao seu servizo abríanlle paso para achegarse á Catedral compostelá, como amosa esta imaxe tamén custodiada na BNE.
-
06
Saúdos fascistas á beira da estrada
Nun clima de dura represión, a poboación agardaba nas beiravías o paso da comitiva do autoproclamado xefe do Estado camiño de Meirás. Na imaxe, dixitalizada pola BNE, en Sobrado dos Monxes.
-
07
Agardando polo receptor da 'doazón'
Naquela primeira visita triunfal a Meirás o alcumado como caudillo foi recibido por dirixentes próximos e xornalistas da prensa máis afín.
-
08
Residencia de verán
Os herdeiros do ditador seguiron a gozar do Pazo de Meirás como residencia de verán tras a súa morte. Mesmo cando a Xunta o declarou Ben de Interese Cultural, continuaron a facelo mentres, ao tempo, se resistían a permitir as visitas ás que obriga a lei.
-
09
Templo franquista
Malia ás resistencias ás visitas, os Franco víronse obrigados a permitilas. Nelas é posible comprobar como a antiga residencia de Emilia Pardo Bazán é na actualidade unha caste de templo franquista. Non en van, a familia encomendou a xestión das visitas á Fundación Francisco Franco.
-
10
As pescudas
Traballos de investigación como o desenvolvido por Carlos Babío e Manuel Pérez Lourenzo resultaron claves para retratar o acontecido en Meirás. Recentemente o os netos de Franco demandaron por inxurias a Babío.
-
11
A mobilización
Nos últimos anos intensificáronse os movementos políticos e legais para tentar recuperar Meirás e, ao tempo, tamén, as mobilizacións para esixir a súa devolución. Unha das máis significativas foi a ocupación simbólica desenvolvida no verán de 2017, para cuxos impulsores os Franco piden fortes penas de cárcere.
-
12
O intento de negocio
Tras o falecemento da filla de Franco, os seus herdeiros puxeron o pazo á venda nunha inmobiliaria cántabra especializada en propiedades de luxo.