Confrarías e organizacións de produtores desde Pontevedra a Guipúscoa salientan que as características do seu litoral difiren das do norte de Europa e decantan a balanza en favor da pesca fronte aos aeroxeradores
Burela acolleu este xoves a presentación do denominado Manifesto de Burela en defensa do sector pesqueiro do Cantábrico-Noroeste, subscrito por 27 federacións provinciais de confrarías e asociacións de produtores desde Pontevedra a Guipúscoa. O manifesto defende o sector pesqueiro costeiro, o máis ligado ás comunidades locais, fronte aos proxectos eólicos que xa se están a impulsar na zona, como os dous que Iberdrola xa está a tramitar fronte a Ortegal, sen que o Goberno de España planificase aínda os usos prioritarios do litoral.
As organizacións asinantes din estar preocupadas polo cambio climático e ser defensoras da descarbonización e as enerxías renovables, pero argumentan que o seu litoral non é lugar adecuado para os aeroxeradores nunha sorte de análise de custo-beneficio entre ese sector e a produción de alimentos de orixe mariña.
![](https://praza.gal/storage/uploads/burela-d8de312.jpeg)
“Os proxectos de implantación de enerxía eólica mariña nas nosas costas non son compatibles cos usos existentes, nin coa escasas plataforma continental destas costas, que difire totalmente doutras zonas marítimas como o Mar do Norte ou o Mar Báltico, nin coa riqueza dos nosos ecosistemas, nin coa preservación da biodiversidade, nin co mantemento da actividade pesqueira”, di o manifesto, que alerta tamén contra os “impactos acumulativos” dos parques eólicos na contaminación acústica sobre aves e mamíferos mariños e nas correntes, ondas e substratos “co conseguinte impacto nos hábitats das especies de interese comercial para a nosa flota”.
O manifesto lembra que o Parlamento Europeo xa puxo por diante a pesca artesanal fronte a enerxía eólica mariña e invoca o “principio de precaución” ante a falta de estudos e planificación
A pesca, di o documento, “é fonte de proteína de primeira calidade, xeradora de emprego e dota de cohesión ás zonas costeiras evitando o desemprego e o illamento destas comunidades, evitando que se produza o efecto de “baleirado” como ocorre en vilas do interior da Península”. “Non queremos converternos en zonas costeira baleiradas”, sentencia o documento.
O manifesto lembra que o Parlamento Europeo xa puxo por diante a pesca artesanal fronte a enerxía eólica mariña e invoca o “principio de precaución” ante a falta de estudos e planificación dos novos desenvolvementos enerxéticos. “Non aceptamos este cambio de paradigma, que poderosos grupos de presión con anuencia en moitos casos das nosas administracións, pretenden impoñernos, de ir cara a unha industrialización do mar como fonte de enerxía renovable, en detrimento do sector pesqueiro, as súas familias”, di o manifesto.