O Goberno galego prevé axudar ao banco con 1,2 millóns de euros en catro anos e salienta que haberá un “servizo de asistencia financeira e de formación”, pero obvia que non será de máis de dúas horas á semana

O conselleiro de Facenda, Miguel Corgos, e varios directivos de Abanca desprazáronse este martes a Chandrexa de Queixa para visitar un dos primeiros cinco caixeiros automáticos xa en funcionamento grazas á axuda que a Xunta comprometeu coa entidade bancaria para que os instale en vilas que xa non contan con servizos financeiros, nalgún caso tras pechar oficinas a propia Abanca. O Goberno galego comprometeu 1,2 millóns de euros en catro anos para subvencionar a instalación e mantemento de caixeiros en principio en 38 concellos, dos que xa están en funcionamento os de Chandrexa de Queixa, A Arnoia, O Páramo, Toques e Lousame.

Facenda salientou este luns, tanto por escrito como nas declaracións do conselleiro en Chandrexa, que a veciñanza disporá ademais do caixeiro “dun servizo de asistencia financeira e de formación”, pero o seu comunicado obvia non só a contía da subvención senón que esta non contempla que o servizo de formación e asistencia sexa de máis de dúas horas á semana. A propia Abanca, noutro comunicado similar, si aclara que “cada acción formativa terá unha duración de dúas horas”, pero non concreta a súa periodicidade. No acto, un responsable da entidade bancaria salientou o "bo criterio" da Xunta por convocar esta subvención.

As condicións da Xunta mesmo lle permiten subvencionar caixeiros alí onde Abanca decida pechar oficinas nos próximos anos

Como vén contando Praza.gal desde antes mesmo de que a Xunta convocase a subvención, o Goberno galego apostou por subvencionar á banca a instalación e mantemento de caixeiros e un máximo de dúas horas á semana dun servizo de asistencia e formación á cidadanía para que opere con eles. O Goberno galego estaba disposto a gastar ata 2,8 millóns de euros en catro anos e ata 14.200 euros por caixeiro e ano, e a oferta gañadora de Abanca rabaixouno á metade, a 7.100 euros por caixeiro ao ano. Hai mes e medio a entidade asegurou que malia á subvención perderá 2.000 euros ao ano con cada un destes caixeiros, polo que o fai polo seu compromiso coa clientela.

Porén, as condicións fixadas pola Xunta mesmo permiten que se subvencione caixeiros alí onde a entidade gañadora decida pechar oficinas nos próximos anos, o que só suporá unha rebaixa na porcentaxe de subvención dun 25%, segundo se fixou na convocatoria. Ademais, entre os 38 concellos que ata o momento se adheriron ao programa da Xunta hai varios nos que a propia Abanca pechou oficinas nos últimos anos.

Fronte á cifra de 38 concellos que a Xunta volveu repetir este martes, Abanca fala de 36, que identifica: Aranga, Coirós, Dodro, Lousame, Paderne, Santiso, Toques, Vilasantar, Vilarmaior, Dumbría, Monfero, O Páramo, Ribeira de Piquín, Samos, A Arnoia, Baltar, Os Blancos, Carballeda de Avia, Cenlle, Chandrexa de Queixa, Xunqueira de Ambía, Xunqueira de Espadanedo, Larouco, Lobeira, Melón, Oímbra, Petín, Piñor, Pontedeva, Porqueira, Rairiz de Veiga, Taboadela, A Teixeira, A Peroxa, Vilar de Santos e San Xoán de Río.

Este martes, na súa nota de prensa, a Xunta salientou que ademais da dispoñibilidade do caixeiro a veciñanza terá “un servizo de asistencia financeira co que poder solucionar calquera dúbida e contratar produtos coma nunha oficina bancaria convencional, e dun servizo de formación financeira e banca electrónica para que poidan empregar os servizos bancarios a través das novas tecnoloxías”. Porén, as bases da subvención contemplan que a Xunta só subvencionará un máximo de dúas horas á semana dese servizo de formación e asistencia.

As bases da subvención din que “o total de horas de prestación do servizo de asistencia e formación máximo subvencionable será de cento catro horas ao ano por concello”, o que suporía dúas horas cada unha das 52 semanas que ten o ano. A Xunta permite que esas horas poidan “distribuírse de xeito asimétrico entre os concellos de destino en función das súas características socioeconómicas e de acordo a un plan personalizado que a entidade beneficiaria deberá presentar”. Isto é, por riba desas 104 horas ao ano, ou dúas horas semanais, o resto do tempo de formación e asistencia que se poida prestar xa correría por conta do banco e non sería unha obriga imposta pola Xunta para entregar a subvención.

Ante estas premisas, o que comunicou este martes Abanca é que “cada acción formativa terá unha duración de dúas horas e nela ensinarase aos asistentes como funciona o caixeiro e cales son as operacións máis habituais que se poden facer, incluíndo unha demostración práctica sempre que sexa posible. Tamén se ofrecerán consellos básicos de seguridade e resolveranse as dúbidas que poidan ter os asistentes”. Abanca non concreta a periodicidade desas accións formativas en cada vila e limítase a indicar que comezarán este mércores 16 no Páramo, o xoves 17 en Chandrexa e o xoves 24 en Lousame.

Os concellos deben poñer os locais e asumir o custo dos subministros de servizos

Por outra banda, Facenda tamén salientou este martes en Chandrexa que “o financiamento corre a cargo da Xunta polo que o concello non tivo que facer ningunha achega económica e só cedeu e acondicionou os espazos necesarios para a instalación dos caixeiros e a prestación dos servizos de asesoramento financeiro e formación”. Porén, os convenios que deben asinar os concellos interesados en participar neste programa prevén que tamén deben ser eles quen asuman custos de electricidade, telefonía ou limpeza.