Xuño adoita ser un mes moi favorable para o emprego e así sucedeu unha vez máis este ano, grazas ao inicio da tempada estival e das contratacións que esta leva aparelladas especialmente na hostalaría e no sector turístico
Xuño adoita ser un mes moi favorable para o emprego e así sucedeu unha vez máis este ano. O inicio da tempada estival e das contratacións que esta leva aparelladas especialmente na hostalaría e no sector turístico tradúcense todos os anos na creación de postos de traballo e na redución do número de persoas desempregadas.
Segundo as cifras que fixo públicas na mañá deste xoves o Ministerio de Traballo e Economía Social, o paro rexistrado baixou en Galicia en 3.587 persoas en xuño, un descenso do 3,3% que foi o maior de todas as comunidades autónomas. No conxunto do Estado o descenso (-28.739) supuño só o 1,24%. Xuño deixa en 105.768 o número de persoas desempregadas en Galicia, a cifra máis baixa dende xaneiro de 2008.
En relación a xuño de 2025 o descenso do desemprego é só de 1.486 persoas, unha caída do 1,39%, moi por debaixo da redución que se produciu no conxunto de España (-4,74%)
Con todo, se se observa a evolución seguida nos últimos 12 meses as cifras de emprego galegas non son tan positivas. En relación a xuño de 2025 o descenso do desemprego é só de 1.486 persoas, unha caída do 1,39%, moi por debaixo da redución que se produciu no conxunto de España (-4,74%). Tan só Aragón, Navarra e País Vasco presentan peores datos.
En canto aos datos de creación de emprego, en xuño aumentou o número de afiliacións en Galicia en 11.166 persoas, un 1% máis. En total. 1.123.034 teñen un emprego remunerado no noso país, a cifra máis elevada dende xaneiro de 2007. No conxunto do Estado as afiliacións medraron menos, un 0,58%, nun mes de xuño que deixou 128.532 persoas máis traballando.
En canto aos datos de creación de emprego, en xuño aumentou o número de afiliacións en Galicia en 11.166 persoas, un 1% máis
En cambio, nos últimos 12 meses a evolución do emprego en Galicia volve ser máis negativa que a media. As 20.383 afiliacións supoñen unha mellora do 1,85% en relación a xuño de 2025, mentres que no conxunto de España o número de empregos creados aumentou un 2,77%.
Como é habitual no mes de xuño, a hostalaría e o turismo foron o gran motor do emprego. No conxunto do Estado tan só a hostelaría supuxo máis dun terzo de todos os postos de traballo creados no último mes.
O aumento continuo de cotizantes débese sobre todo á afiliación de persoas estranxeiras, que supoñen preto de dous de cada tres dos novos empregos creados en Galicia no último ano
En Galicia o paro descendeu en todos os sectores, especialmente no sector servizos (-3.272) e só se incrementou no colectivo de persoas sen emprego anterior, formado en boa medida por mozos e mozas e por outras persoas que se incorporan ao mercado laboral.
A evolución do mercado laboral galego estivo marcada en xuño, ademais, por unha elevada temporalidade e rotación, cun aumento de máis do 40% no número de contratos temporais.
O aumento continuo de cotizantes débese sobre todo á afiliación de persoas estranxeiras, que supoñen preto de dous de cada tres dos novos empregos creados en Galicia no último ano.
