A ministra de Defensa, María Dolores de Cospedal, cae na broma telefónica duns humoristas rusos que facéndose pasar por persoal do Ministerio de Defensa de Letonia a convencen de que Puigdemont é un espía ao servizo de Rusia.
Fálase
A simetría das bestas, de Alberto Ramos, Premio Vicente Risco. O escritor e xornalista compostelán, colaborador de Praza.gal, xa gañara o mesmo premio en 2012 con Todos os días. O xurado salienta o “corte filosófico” da obra que concede “espazo de dignidade aos outros, aos diferentes, aos marxinados”.
O Supremo ratifica a condena de Socorro Cea, ex-alcaldesa de Melide polo BNG, por prevaricación e falsidade en documento oficial na execución dunha depuradora. Con ela foi condenado o arquitecto municipal por certificar en 2009 que a obra estaba máis avanzada da realidade para evitar perder unha subvención da Xunta.
“Ten unha longa experiencia e sabe de primarias e de eleccións”, eloxia Feijóo a Pachi Vázquez ante o anuncio do socialista de que volve á primeira liña política e competirá por dirixir o PSdeG en Ourense.
A Xunta publica no DOG a contratación por 51 millóns dos seus helicópteros de salvamento marítimo á mesma empresa á que llos vendera previamente. Babcock é a compañía na que se integrou Inaer, a mesma cuxas adxudicacións en materia de incendios manteñen imputado a Tomás Fernández-Couto, o máximo responsable da política forestal da Xunta.
A Xunta nomea Embaixador do Camiño de Santiago o Rei emérito Juan Carlos, do que Feijóo salienta que “pasa bastantes tempadas en Galicia”. É o cuarto receptor, tras o daquela príncipe Felipe, Vicente del Bosque e Mariano Rajoy, dunha distinción que o Goberno galego engadiu ás varias que xa tiña creadas pero deu de lado.
O imán de Ripoll, considerado cerebro dos atentados de agosto en Catalunya, foi confidente do Centro Nacional de Inteligencia. Segundo a información que publica El País, os servizos secretos do Estado captárono mentres estaba preso en Castellón.
O economista Antón Costas critica que a mellora económica non se estea a traducir en melloras laborais. Costas reflexionou este xoves en Santiago sobre diversas cuestións económicas, políticas e sociais, como xa fixera devagar hai uns meses nesta entrevista en Praza.gal
Kiss e Scorpions, entre as primeiras bandas confirmadas para o Resurrection Fest de Viveiro, que en 2018 se celebrará do 11 ao 14 de xullo.
Alumnado galego e portugués realizou este xoves, Día Mundial do Patrimonio, dúas horas de radiovisual con motivo da presenza do Pergamiño Vindel en Vigo, nunha iniciativa de Ponte nas Ondas en cuxa páxina se retransmitiu o evento
