Parte do Gordo da Lotaría do Nadal, o 3.347, cae en Teo, Santiago, Pontevea, Fene, A Coruña, O Pino, Ourense, O Porriño, A Estrada, Bueu, Outes, Cedeira, Zas, O Valadouro, Vilalba, Lugo, Monforte, Pontevedra, Vigo, Sanxenxo, Redondela e Poio . Comproba aquí os teus números
Tras o trixésimo primeiro venres negro, persoal da CRTVG desenvolve este sábado 22 unha nova xornada de folga. O máis destacado da mobilización, hoxe en Praza.gal
A militancia de En Marea está chamada a votar nas súas eleccións internas dende as 9 desta mañá e ata a mesma hora do luns, xornada na que se proclamarán os primeiros resultados. A candidatura do sector crítico, 'Entre todas', decidiu finalmente participar malia expresar "dúbidas" sobre o mesmo nun clima de enfrontamentos cruzados que marcou as últimas semanas na formación.
A candidatura Entre Todas mantén a súa participación nas eleccións internas de En Marea, que segundo o novo calendario se van desenvolver dende mañá, día 22, e ata o luns e pide "restituír a limpeza das regras do xogo". En declaracións á Cadena SER, David Bruzos manifestou "dúbidas" sobre o proceso porque a empresa que ía auditar o proceso finalmente non o fará. Esquerda Unida, pola contra, sinala nun comunicado que segue "considerando que non se dan as condicións democráticas para votar".
Bob Dylan actuará en Santiago o 29 de abril. Será no Multiusos Fontes do Sar e as entradas estarán á venda o día 28 deste mes, segundo vén de informar o Concello. Dylan regresa a Galicia 15 anos despois do seu último concerto no país, tamén en Compostela, no Monte do Gozo no marco do Xacobeo 2004. O músico xa actuara no Fontes do Sar en 1999.
O colectivo feminista Paxaretas lamenta que o Concello de Redondela organice un concerto "solidario" de nadal a prol do colectivo antiabortista Red Madre. "Non imos aceptar que dende a institución municipal que nos representa a todas e todos se faga política antiabortista", sinalan nun comunicado. Esta organización antiabortista, impulsada polo Foro Español de la Familia, recibiu numerosos apoios lexislativos e económicos da Xunta nos últimos anos.
Pedro Sánchez e Joaquim Torra acordan procurar unha solución política con "amplo apoio en Catalunya" e "seguridade xurídica" no seu encontro previo ao Consello de Ministros que hoxe se celebra en Barcelona entre diversas mobilizacións de colectivos independentistas.
En Marea e Ferrol en Común reclaman no Congreso "un tren digno" entre A Coruña e Ferrol. Os deputados da formación galega rexistraron varias iniciativas, entre elas dúas proposicións de lei sobre o inicio do estudo informativo da actuación do by-pass de Piadela (Betanzos) na liña e outras actuacións para a mellora da liña.
Feijóo volve desentenderse do conflito na CRTVG, que segue sen cumprir coa lei de medios públicos que el mesmo impulsou en 2011, e remite novamente as explicacións á dirección do ente. Despois de que a semana pasada o presidente rexeitase contestar a un reporteiro gráfico de TVE que lle preguntou unha vez rematada a súa rolda de prensa semanal polo conflito na CRTVG, a Feijóo volvéuselle preguntar este xoves polo mesmo. Segundo dixo, el nunca deixa de responder ningunha pregunta dun “xornalista” pero “as cuestións da CRTVG, que as conteste a CRTVG”.
A Xunta renova o complemento das pensións que implantou o bipartito e que o PP quixo suprimir pero manteno conxelado por oitavo ano. A contía está estancada en 206 euros desde 2010 malia que desde aquela o custo da vida aumentou preto dun 10%.
