O Teatro Afundación de Vigo cancela o espectáculo de Jorge Cremades. "A violencia machista é unha grave lacra social e non podemos ser insensibles ao rexeitamento" das "declaracións" do cómico, indica a entidade dependente de Abanca nun comunicado. A pasada semana a Deputación da Coruña pedira a cancelación do espectáculo no Teatro Colón da Coruña e a empresa concesionaria asegurara que non era posible.
Feijóo pide un "feminismo sen etiquetas" e "defensa da muller sen adxectivos" nun acto sobre liderado feminino organizado pola Xunta na véspera do 8 de marzo. Recólleo Europa Press na súa web. A pasada fin de semana o presidente da Xunta instou nun acto do PP a "non politizar a igualdade" porque sería "unha falta de respecto" ás mulleres.
O TSXG rexeita todas as causas de nulidade contra o PXOM de Lugo agás as referidas ao polémico edificio do Garañón, que o goberno local prevé derrubar. Adiántao El Progreso
Denuncian ante a Valedora do Pobo a contratación irregular de centos de persoas en Correos. A CGT calcula que arredor de 1.000 contratos formalizáronse sen proba selectiva ningunha e a Inspección de Traballo xa sancionara a empresa pública por 600 contratacións ilegais.
VÍDEOS | O afundimento do Prestige e imaxes do Camiño de Santiago e varias cidades galegas, entre os contidos ligados a Galicia no arquivo da RTP, que a televisión portuguesa vén de dixitalizar e liberar integramente na súa web.
A selección feminina de fútbol sala ultima a preparación do encontro ante Catalunya, este serán ás 20:30 no Pavillón Santa Isabel de Santiago. O combinado galego adestrou este martes no escenario do encontro (na imaxe, publicada pola FGF).
Nova unanimidade no Parlamento a prol do traspaso da AP-9. A anterior lei, tamén apoiada por todos os grupos en Galicia, foi vetada polo Goberno de España antes de ser tramitada no Congreso. A información do debate, esta mañá en Praza.
Les Républicains apoian por unanimidade a candidatura presidencial de Fillon, a pesar da súa imputación e de que nas sondaxes é terceiro, a gran distancia de Le Pen e Macron e con escasas opcións de pasar á segunda volta. As eleccións presidenciais francesas celebraranse o 23 de abril e o 7 de maio
Aprobado inicialmente o orzamento municipal da Coruña, despois de que PP e PSOE non acadasen un acordo para impulsar unha moción de censura, pechando o proceso iniciado hai un mes coa moción de confianza presentada por Xulio Ferreiro. Agora ábrese un prazo para que partidos e veciñanza presenten alegacións ao documento
ENCE anula de momento o seu proxecto de instalar unha planta de biomasa en Pontevedra, optando finalmente por Huelva.