🏳️🌈
O PSOE readmite o alcalde de Becerreá como militante tras 15 meses de suspensión. Manuel Martínez, agora vicepresidente da Deputación de Lugo, estivo inmerso nun proceso de expulsión do partido polas súas votacións co PP, entre elas a que lle dera aos populares a presidencia da institución lucense, a cal volveu aos socialistas tras a moción de censura de outubro de 2015. Cóntao El Progreso
Os galegos Triángulo de Amor Bizarro, triunfadores dos Premios da Música Independente con catro galardóns. O premio ao mellor álbum en galego foi para Eladio y los seres queridos, polo seu disco Cantares.
As doce persoas xulgadas pola ocupación da Sala Yago no ano 2011 veñen de ser condenadas ao pagamento dunha multa (360 euros cada unha e 2.000 de forma colectiva) por un delicto de usurpación de inmobles. Dúas delas, ademais, foron condenadas a un ano e medio de prisión por tenza de explosivos, tras asumir este delicto hai dúas semanas durante o xuízo.
Condenada a un ano de cadea unha usuaria de Twitter por chistes sobre Carrero Blanco nesta rede social. Está a contalo eldiario.es
Este venres inaugúrase na Coruña a exposición Paredes soñadas, que amosa o restaurado mural Vista de A Coruña 1669, entre outras obras que Lugrís pintou en igrexas, hoteis ou na fábrica de Massó. A mostra poderá verse na sede de Afundación ata o 2 de setembro.
A Revista Dot Galicia está a piques de pechar a súa campaña de crowdfunding para a publicación do segundo volume do libro 50 Ilustradores Galegos Actuais, tralo éxito do primeiro volume, editado en 2014. A obra amosa o traballo de medio cento de profesionais do país e nunha exposición en Compostela pódense ver 200 traballos dun cento de autores e autoras
Esta noite entréganse os Premios María Casares. O Teatro Rosalía de Castro acollerá a gala a partir das 20.30 horas. Emitirase en directo por streaming na web da CRTVG e pola TVG, en diferido, a partir das 23.45 horas. O tolleito de Inishmaan (11 candidaturas), Eroski Paraíso (8), Raclette (5) e Voaxa e carmín (5) encabezan a lista de finalistas. Imma António lerá o manifesto do teatro galego.
A Colectiva, Asociación Profesional de Artistas de Galicia convoca un Velorio pola Cultura diante do MARCO de Vigo para este venres ás 20 horas. A entidade amosa a súa preocupación polo futuro do museo vigués e, de forma xeral, polas "políticas culturais da nosa comunidade". Iñaki Martínez anunciou en xaneiro que abandonaría a dirección do centro o vindeiro mes de novembro, alertando da "complicada" situación do MARCO.
Compostela acolleu a preestrea de Vidago Palace, a primera serie de ficción coproducida pola CRTVG e a RTP portuguesa. Comezará a emitirse este mércores na TVG
Unha plataforma veciñal presenta un informe ante a Xunta para que declare Ben de Interese Cultural o Parque do Pasatempo, en Betanzos. O pleno municipal aprobou xa tres mocións demandándolle ao Goberno galego a declaración.