Pablo Casado reitera a súa oposición á oficialidade da lingua asturiana e ridiculiza o movemento que a defende afirmando nun mitin en Oviedo que "os nenos asturianos" non poden "estar estudando só os hórreos ou os frixuelos -prato asturiano semellante ás filloas ou freixós-". O movemento pola oficialidade do asturiano medrou notablemente nos últimos anos.
A Xunta entrega no mosteiro de Montederramo os Premios da Cultura galega a Xosé María Álvarez Cáccamo (Letras), Luz Darriba (Artes Plásticas), Festival Internacional Outono de Teatro (Artes Escénicas), Festival de Cans (Audiovisual), A Roda (Música), Antón Santamarina (Lingua), O Sorriso de Daniel (Patrimonio Cultural) e Ramón Villares (Proxección Exterior).
Persoal da CRTVG celebra o #VenresNegro34CRTVG por uns medios públicos "sen ataduras, ambiciosos, profesionais, modernos, atrevidos, cunha axenda informativa diferenciada e á vangarda, sen represalias e nos que non sobra nin falta ninguén".
O BBVA mercou a un ex-comisario encarcerado por presunta corrupción gravacións de conversas entre a ex-vicepresidenta De la Vega e o ex-ministro Miguel Sebastián. É unha información de El Confidencial
O PP confirma que presentou unha iniciativa no Congreso para defender a expulsión de menores inmigrantes non acompañados, como anunciara Casado. Trátase dunha proposición non de lei que, previsiblemente, non xuntará votos dabondo no pleno para ser aprobada e que, en caso de selo, non é vinculante para o Goberno.
A portavoz de infraestruturas de En Marea no Congreso, Alexandra Fernández, reúnese co secretario xeral de Infraestruturas do Ministerio de Fomento e ratifica a aposta do Goberno central polo mantemento das estradas e a mellora da súa seguridade. “É moi positivo o cambio de estratexia, de apostar polo mantemento e mellora e non de construción de novas infraestruturas sen manter as actuais”, di.
Un grafiteiro alcumado El primo de Banksy que dende hai uns meses plasma os seus deseños en rúas de Lugo homenaxea A derradeira leición do mestre de Castelao na contorna do Vello Cárcere, o centro cultural municipal no que foi reconvertida a antiga prisión da cidade. Imaxe divulgada por Rubén Arroxo, voceiro municipal do BNG en Lugo.
ENQUISA O PSOE manteríase como forza máis votada en eleccións xerais, pero nun empate técnico co PP e con maioría absoluta para un Goberno da dereita. Así o indica o inquérito que publica eldiario.es, que prognostica unha irrupción da extrema dereita no Congreso.
Xa está en marcha en Santiago a mobilización en defensa da sanidade pública e en apoio da folga que vén mantendo o persoal de Urxencias do hospital da cidade. Consulta aquí o máis destacado da mobilización
PP e Vox acadan un acordo para formar goberno en Andalucía que fará ao popular Juanma Moreno presidente da Junta. Entre os 37 puntos do texto [aquí, o documento] están medidas de reforzo da educación privada e concertada, “apoiar e promover as expresións culturais e populares andaluzas como o flamenco e a Semana Santa”, “apoiar por lei a tauromaquia” e “recoñecer a importancia” da caza.
