Ana Romaní, galardoada co premio Nacional de Periodismo Cultural, que concede o Ministerio. O recoñecemento chega despois de que a Radio Galega suprimise o Diario Cultural co seu formato habitual, tornándoo en microespazos en diversos treitos da programación. O xurado destaca a súa "longa traxectoria" xornalística, o seu constante traballo de promoción da cultura e a súa "visión de feminismo crítico e compromiso social"
ENQUISA | O CIS sitúa o PSOE como líder en intención de voto en eleccións xerais cun 30,5% dos sufraxios, case 10 puntos por riba do PP, ao que ubica próximo ao empate técnico con Ciudadanos en segunda posición. Unidos Podemos e as súas confluencias ocuparían a cuarta posición co 16,1% dos votos. A sondaxe foi realizada entre o 1 e o 11 de setembro. Máis información en eldiario.es
A comisión de investigación sobre os recortes sanitarios pactada por En Marea, PSdeG e BNG bota a andar este xoves. A primeira tarefa deste órgano, activado automaticamente malia á oposición do PP pero no que os populares teñen maioría, será elixir a Mesa que dirixirá os traballos.
Alumnado, profesorado, nais e pais do CEIP de Cedeira, en Redondela, volve vestir de negro para protestar pola supresión dunha praza de mestre e do desdobre en Sexto de Primaria. A comunidade educativa realizou igualmente unha cazolada ante o Concello. Brión, Santiso, Santa Comba, Ordes, Roxos ou Allariz tamén manteñen protestas polos recortes no ensino.
Os premios da Cultura Galega 2018 serán para Xosé María Álvarez Cáccamo, Luz Darriba, O FIOT de Carballo, A Roda, o Festival de Cans, Antón Santamarina, O Sorriso de Daniel e Ramón Villares. Así o decidiu este luns o xurado dos galardóns.
VÍDEOS A intervención dos antidisturbios para impedir o referendo catalán do 1-O, dende as cámaras da Policía. Eldiario.es publica en exclusiva as gravacións policiais da procura de urnas e das cargas contra votantes.
PP e Ciudadanos fan valer a súa maioría na Mesa do Congreso para tombar a emenda coa que o PSOE procuraba aprobar a senda de estabilidade orzamentaria sen pasar polo Senado, ao que os populares lle outorgaron capacidade de veto nesta materia cando estaban no Goberno. PP e C's non teñen maioría no pleno do Congreso, pero si no seu órgano reitor grazas aos seus pactos de inicio de lexislatura.
Falece practicando kitesurf na Illa de Arousa Carlos Castaño, concelleiro do PSdeG en Catoira. O secretario xeral dos socialistas galegos, Gonzalo Caballero, transmite as condolencias á familia e compañeiros.
Medio Rural dá por "controlado" o incendio da Fonsagrada e especifica que atinxe a unhas 26 hectáreas. Este incendio foi revelado o domingo polos bombeiros forestais que traballaban nel e Medio Rural non ofreceu datos ao respecto ata a mañá deste luns, cando especificou que na zona actuaron ata 31 brigadas e 10 helicópteros. Imaxe tomada por bombeiros forestais da Brigada de Marroxo.
Trapero, ex-xefe dos Mossos, puxo a policía catalá "á disposición" das ordes de xuíces e fiscais antes do referendo do 1-O. As cartas que acreditan ese ofrecemento publícaas este luns eldiario.es
