Fálase

Fillas de Cassandra presenta un novo espectáculo que só existirá no directo, Últimas Dionisíacas, que verá a luz o 16 de febreiro en Vigo. O dúo formado por María SOA e Sara Faro, que vén de xirar polo país co seu disco debut, Acrópole, presenta unha nova proposta escénica e musical que supón "un convite ao festexo colectivo e catártico" e na que estarán acompañadas polas músicas Tania Caamaño e Marina Vidal, coa axuda de Berto na produción. O hall do Auditorio Mar de Vigo acolle a posta en escena, coas entradas xa á venda. 

• ENTREVISTA EN VINTE| Fillas de Cassandra: «Queremos permitirnos errar»
• Un récord de votación outorga a Fillas de Cassandra o premio aRi[t]mar a Mellor Música do Ano en Galicia

A Xunta colabora coa plataforma de vídeo a demanda en liña Filmin e crea un apartado monográfico con películas, series e curtametraxes de autoría galega, xunto con filmes que se poden ver dobrados ou subtitulados ao galego. A canle Cinemas_GAL recompila pezas audiovisuais dispoñibles na plataforma e agrupa os contidos en categorías como 'éxitos recentes do cine galego' ou 'o mellor cine europeo en galego'. Poden verse filmes estreados en 2023 como Matria, de Álvaro Gago, ou películas como O que arde, Lúa Vermella, O corpo aberto, Dhogs, 9 Fugas, Nación, Valentina ou Dorothè na vila. 

Sumar Galicia promete poñer en marcha un metro lixeiro nas áreas metropolitanas de Vigo e da Coruña "antes do remate da vindeira lexislatura". A formación prevé o inicio das obras en 2026 e anuncia que creará unha Consellería de Mobilidade no caso de formar parte do novo goberno da Xunta. 

Interrumpido o tráfico na liña ferroviaria Ferrol-Oviedo tras impactar un tren contra unha árbore no Vicedo. O accidente non provocou feridos aínda que os ocupantes do ferrocarril permaneceron máis de dúas horas atrapadas. 

A ONG CEMMA amosa nun vídeo todo o plástico recollido no estómago dun baleato morto na Coruña o pasado ano. O cetáceo foi atopado na praia das Amorosas e faleceu a causa dos plásticos inxeridos. As costas galegas rexistraron en 2023 un récord de animais varados. 

🎉 Este 1 de xaneiro, Aninovo, Praza.gal non se actualiza por descanso do persoal. A redacción de Praza e a Fundación Praza Pública deséxanvos boas festas e feliz 2024! Deixamos moito para lerdes e o martes estamos de volta!

Pontón lanza unha mensaxe de Fin de Ano desde o barrio no que vive en Compostela para prometer que "con vós, poremos en marcha a mellor Galiza".

Besteiro despide o ano compartindo unha receita e desexando "bo proveito, bo 2024".

Cales foron os acontecementos culturais deste 2023? En VINTE realizaron unha enquisa entre vinte colaboradoras e colaboradores da revista e este é o resultado:

• Vinte destaques de 2023. Fitos e feitos culturais que marcaron as nosas vidas este ano

PP e PSOE rexistran unha reforma da Constitución para mudar o termo "diminuídos" por "persoas con discapacidade". É un acordo ao que chegaron Sánchez e Feijóo hai dúas semanas tras anos de reclamacións desde os colectivos sociais. [Imaxe: Pool Moncloa/Fernando Calvo]

• HEMEROTECA | En 1 de cada 4 fogares galegos vive unha persoa con discapacidade, a proporción máis elevada do Estado