A secretaria xeral de Igualdade afirma que "a situación actual da lei do aborto é adecuada" e chama a "respectar ás persoas, tomen a decisión que tomen" porque "cada persoa é dona do seu corpo". Susana López Abella retrucou deste xeito ás preguntas da prensa sobre a intención de Pablo Casado de derrogar a lei do aborto se tivese votos dabondo no Congreso para facelo. Recólleo El Progreso
David Rubín pon a imaxe á vixésimo terceira edición dos premios de teatro María Casares. O autor ourensán, con proxección internacional no mundo da banda deseñada, "recupera o rostro de María Casares" e tenta "representar o que significa ser, non só intérprete, senón profesional do teatro". Os galardóns entréganse o 21 de marzo no teatro Rosalía Castro da Coruña.
O TSXG condena a Xunta a indemnizar con 38.800 euros a dous ocupantes dun vehículo que bateu cun xabarín na estrada PO-205 ao seu paso por Silleda en outubro de 2015. O tribunal considera que o Goberno galego debeu instalar sinais sobre o perigo da "frecuente presenza das especies que son obxecto de caza". A indemnización, aclara o TSXG, esténdese tamén á aseguradora dos accidentados.
PSOE e Unidos Podemos alíanse para eliminar o voto rogado antes das eleccións de maio. Rexistran este venres no Congreso unha proposta para modificar a lei electoral, como advertira o Goberno central no verán, e poder aplicala nos próximos comicios autonómicos aos votantes residentes no exterior. A eliminación do actual sistema fará retornar tamén as pantasmas do "voto emigrante".
Feijóo cambia a súa axenda nos Estados Unidos e agora prevé ir á manifestación das dereitas contra Pedro Sánchez: “Se ten forma de estar en Madrid, estará”, confirma o PP a Praza.gal
O BNG presenta o primeiro treito da súa candidatura en Santiago. Tras a candidata á alcaldía, Goretti Sanmartín, sitúase Navia Rivas de Castro, seguida de Lois Calvelo, Pilar Lueiro, Xosé Quintáns e Esther Martínez. "O BNG ofrece un proxecto ilusionante, transformador e cun modelo de cidade que mira ao futuro", afirmou Ana Pontón durante a presentación.
O TSXG valida o acordo do edificio Fenosa na Coruña e pon fin a 21 anos de litixio. A sala do contencioso-administrativo valida por maioría o alcanzado entre as partes tras a mediación impulsada polo Concello.
A Academia Galega do Audiovisual revela esta mañá as obras e persoas finalistas aos premios Mestre Mateo. Toda a información, hoxe en Praza.gal
O Parlamento "recoñece e declara a honorabilidade da institución da Masonería" e "apoia o dereito dos seus membros a defender os seus ideais no marco do ordenamento democrático". Foi unha proposición do PSdeG na comisión institucional da Cámara galega que saíu adiante por unanimidade.
Pablo Casado reafirma a súa intención de restrinxir o dereito ao aborto porque "se queremos financiar as pensións debemos pensar en como ter máis nenos e non en como abortalos", di razoar. O líder do PP afírmao nunha entrevista coa axencia EFE que recolle laSexta na súa web.
