O líder do PP en Santiago declárase "satisfeito" polo acto no que recolleu lixo das beiras do Sar e o guindou ao río para denunciar "contaminación". "Grazas a ese traballo de divulgación, o problema é coñecido en toda Galicia e en moitos sitios de España", afirma o ex-conselleiro de Medio Ambiente, Agustín Hernández. Nós TV recolle as súas declaracións.
O Goberno de Rajoy leva aos tribunais a Cifuentes pola suba salarial para os traballadores da Xustiza en Madrid, un acordo dun incremento retributivo de 120 euros mensuais para os funcionarios. O recurso a este pacto chega en medio da folga do persoal xudicial en Galicia, que reclama, entre outras cousas, o aumento do complemento autonómico.
A Xunta convoca os sindicatos a unha nova xuntanza o luns para intentar deter a folga do persoal de Xustiza, que hoxe cumpre a súa oitava xornada de paro indefinido. Neste xoves, Feijóo lanzou a poboación parada e precaria contra os funcionarios.
A falta de apoio na Eurocámara a Luis de Guindos para vicepresidir o Banco Central Europeo desconcerta o Goberno de España. Cóntao eldiario.es. Antes de ser ministro De Guindos ostentou un alto cargo en Lehman Brothers e foi clave en procesos como o rescate bancario ou a venda de Novagalicia Banco.
O Goberno central estuda usar o 155 para ir contra o modelo de inmersión lingüística catalán e impulsar o castelán a través da opción do idioma para os pais no sobre de matrícula para os pais.
Xunta e Ministerio do Interior acordan agora que a Garda Civil forme parte do centro de atención de emerxencias do 112 autonómico, no que aínda non están integrados bombeiros, Policía Nacional, Policía Autonómica nin Grupos de Emerxencia Supramunicipal (GES). Hai ano e medio, no incendio da conserveira Fandicosta, os axentes queixábanse do “caos” e da falta de coordinación. Na vaga de incendios de outubro os brigadistas volveron criticar o colapso do 112, ao que o propio Feijóo recomendara dirixir todas as chamadas.
O cura de Xermade avoga por "expulsar" a Feijóo e Rajoy da Igrexa por "usureiros" e por seren "responsables da cantidade de sufrimento que padece a xente, como o bote das pensións, que está baleiro", di Luis Rodríguez Patiño. Radio Lugo recolle as súas declaracións.
Feijóo critica que Ciudadanos “está máis preocupado por buscar réditos electorais que polos intereses do noso país”. O presidente galego lamenta que os de Rivera rexeiten aprobar os orzamentos do Estado se o Goberno central conta tamén co apoio do PNV. Nas autonómicas de 2016 Feijóo apelara aos seus votantes "por todo o que compartimos".
Funcionarios de Xustiza maniféstanse nas sete cidades galegas na sétima xornada da folga indefinida, na que reclaman que se poña fin á "discriminación" que din sufrir a nivel económico e de dereitos laborais. O seguimento do paro supera o 80%. Consulta aquí toda a información da xornada de protestas.
Adif rectifica e inclúe o galego como “imprescindible” para a atención ao público na estación de A Rúa-Petín, na que só esixía castelán e inglés ou francés. A empresa pública vén de corrixir as condicións da privatización da venda de billetes nesa estación e na do Barco, que hai un ano ameazara con pechar.
