O galego Xabier Fortes dirixirá Los Desayunos de TVE, segundo avanza El País. Fortes, membro do Consello de Informativos da canle estatal, participou activamente nas mobilizacións contra a manipulación informativa e conduciu La noche en 24 horas ata a chegada da cúpula impulsada polo Goberno do PP en 2012. Nesta entrevista en Praza.gal debullou as reivindicacións do persoal.
O conselleiro de Sanidade carga contra os colexios médicos por "inoportunos" tras lle pedir explicacións do falecemento no PAC da Estrada. A organización colexial está a ser "inxusta" coa Xunta, segundo di Jesús Vázquez Almuiña e recolle La Voz de Galicia
Vítimas de ETA desmárcanse do PP de Pablo Casado e rexeitan que Sánchez este a facer "concesións" a presos encarcerados por asasinaren no nome da banda terrorista. Segundo os populares, o Goberno central "premia os verdugos e castiga as vítimas" e Feijóo agrega que os traslados deben contar co "visto e prace" do seu partido. Tamén Ciudadanos carga contra a aplicación da lei no achegamento destes presos a cárceres de Euskadi.
Os traballos de restauración logran eliminar a pintada da escultura da fachada de Praterías da Catedral de Santiago. Os traballos custaron uns 12.000 euros á Fundación Catedral e implicaron a aplicación de láser e disolvente. A columna estará protexida durante uns días cunha barreira de seguridade e unha indicación de "non tocar".
Feijóo, sobre o máster de Pablo Casado: "Se el está tranquilo, eu tamén". O presidente da Xunta afirmou a preguntas dos xornalistas en Madrid que el mesmo "preguntou" ao novo presidente do PP sobre o caso e "manifestou absoluta tranquilidade".
O alcalde de Barreiros alega que o castro empregado como aparcadoiro de autocaravanas é "unha leira particular" e "se é prexudicial, o Seprona debe actuar". Recólleo Historia de Galicia
O Senado da Arxentina tomba a legalización do aborto por 38 votos contra 31. A defensa da reforma, que saíra aprobada do Congreso, foi impulsada por unha enorme mobilización do movemento feminista no país e tamén a nivel internacional.
Oliver Añón gaña o XIII Premio Castelao de Banda Deseñada da Deputación da Coruña coa súa obra Canción para afundir flores no mar
O Festival Intercéltico de Lorient estará dedicado a Galicia en 2019. Así o vén de confirmar a organización do certame, que se está a celebrar na localidade bretoa con abondosa presenza galega.
Detido o narcotraficante Manuel Charlín nunha operación na Arousa e no Salnés na que foron prendidas pola Policía outras 18 persoas e que continúa en marcha. Máis información, hoxe en Praza.gal. (Imaxe: gravación da TVG durante o xuízo da operación Nécora en 1994).
