A Unesco informa favorablemente para que a Ribeira Sacra sexa Reserva da Biosfera a finais de verán. A nova chega poucos días despois de que a Xunta e o Goberno central decidisen aparcar a carreira para que sexa tamén declarada Patrimonio da Humanidade.
Ana Romaní e Inma López Silva, gañadoras dos Premios da Crítica 2020 en poesía e narrativa en lingua galega polas súas obras A desvértebra e O libro da filla, respectivamente.
Unha multitudinaria manifestación en Santiago clama contra a "invasión eólica" e reclama a paralización da avalancha de proxectos en tramitación. Toda a información, hoxe en Praza.gal. Foto: BNG.
As principais economías do mundo acordan crear unha taxa dixital e un imposto mínimo global do 15% ás empresas. Os ministros de Finanzas do G7 alcanzan un acordo que será ratificado polos xefes de Goberno en poucos días. Foto: HM Treasury.
Morre unha muller no incendio da súa casa en Oroso o mesmo día no que ía ser desafiuzada. A Garda Civil investiga se o fillo, que está ferido grave, foi quen provocou o lume.
Sanidade anuncia que o luns A Pobra do Caramiñal e Mos deixarán de ter peche perimetral pola COVID, os dous últimos que quedaban en Galicia. A partir das cero horas do luns día 7 eses dous concellos que estaban en nivel máximo pasarán ao nivel alto de restricións, no que tamén están Ordes e Viveiro. Á espera de que o DOG concrete as restricións para o luns 7, ás cero horas deste sábado 5 entran en vigor novas restricións noutros concellos acordadas o pasado martes. [Imaxe: A Pobra do Caramiñal, CC-BY-SA Praza Pública].
24 concellos membros do Fondo Galego de Cooperación e Solidariedade únense este sábado ás 23 horas ao “apagón” da iluminación de edificios públicos para concienciar contra o cambio climático.
Xunta e Goberno de España acordan un "adiamento estratéxico" da presentación da candidatura da Ribeira Sacra ante a UNESCO para ser declarada Patrimonio da Humanidade. Así o confirmaron tras unha reunión en París do conselleiro de Cultura, Román Rodríguez, co embaixador de España ante a UNESCO, Andrés Perelló. Ambos admiten "severas discrepancias" co informe realizado por Icomos, organismo asesor da UNESCO, que entre outros aspectos pon o foco no impacto dos encoros neste territorio. Recólleo Cultura Galega
O pleno da Coruña aproba definitivamente a ordenanza municipal de uso do galego cos votos a prol do grupo de goberno (PSdeG), Marea Atlántica, BNG e a edil non adscrita (Podemos). O PP votou en contra.
Falece aos 69 anos Isaura Abelairas, deputada do PSdeG no Parlamento. Padecía un cancro dende hai catro anos. Abelairas, mestra de profesión, desenvolveu a súa traxectoria profesional no CEIP vigués Emilia Pardo Bazán (1993-2007) e exerceu como concelleira no Concello de Vigo e deputada provincial. "Sempre socialista e feminista, optimista e loitadora ata o último momento. Defensora das causas xustas, da igualdade, da educación pública", destaca o secretario xeral do PSdeG, Gonzalo Caballero.
