Fálase

Xunta e Goberno de España acordan un "adiamento estratéxico" da presentación da candidatura da Ribeira Sacra ante a UNESCO para ser declarada Patrimonio da Humanidade. Así o confirmaron tras unha reunión en París do conselleiro de Cultura, Román Rodríguez, co embaixador de España ante a UNESCO, Andrés Perelló. Ambos admiten "severas discrepancias" co informe realizado por Icomos, organismo asesor da UNESCO, que entre outros aspectos pon o foco no impacto dos encoros neste territorio. Recólleo Cultura Galega

O pleno da Coruña aproba definitivamente a ordenanza municipal de uso do galego  cos votos a prol do grupo de goberno (PSdeG), Marea Atlántica, BNG e a edil non adscrita (Podemos). O PP votou en contra.

• HEMEROTECA | A Coruña deixa de ser a única cidade sen ordenanza de uso do galego

Falece aos 69 anos Isaura Abelairas, deputada do PSdeG no Parlamento. Padecía un cancro dende hai catro anos. Abelairas, mestra de profesión, desenvolveu a súa traxectoria profesional no CEIP vigués Emilia Pardo Bazán (1993-2007) e exerceu como concelleira no Concello de Vigo e deputada provincial. "Sempre socialista e feminista, optimista e loitadora ata o último momento. Defensora das causas xustas, da igualdade, da educación pública", destaca o secretario xeral do PSdeG, Gonzalo Caballero.

• OBITUARIO | Falece Isaura Abelairas, deputada e veterana concelleira do PSdeG en Vigo

Os ósos humanos aparecidos nunha parcela propiedade do Concello no barrio compostelán de Salgueiriños proceden das obras de reparación do muro do parque de San Domingos de Bonaval, antigo cemiterio da cidade, que esborrallou durante o temporal de finais de 2019 (na imaxe). Segundo o goberno local, "os entullos depositáronse nese predio por se nun futuro fosen de interese para investigación", se ben unha vez achados en Salgueiriños, "o forense de garda" considerou que non teñen "transcendencia legal" e que " tanto estes como os que se vaian atopando, se trasladen ao depósito do cemiterio municipal". Na imaxe, parte do muro derrubado.

O Ministerio de Sanidade aproba restricións comúns á hostalería en toda España ata inmunizar o 70% da poboación. Os bares deixarán de servir ás 12 e pecharán á 1 da madrugada e o ocio nocturno abrirá ata as 2. 

O Tribunal de Xustiza da UE paraliza provisionalmente o levantamento da inmunidade parlamentaria do ex-presidente catalán Carles Puigdemont e dos  ex-conselleiros da Generalitat Toni Comín e Carla Ponsatí. O Tribunal suspende cautelarmente a decisión tomada polo Parlamento Europeo o pasado marzo mentres a propia Eurocámara non presenta as súas alegacións. Cando o faga, detalla nun comunicado oficial, "adoptarase un auto definitivo" ao respecto.

Feijóo xustifica cunha viaxe “internacional” a súa ausencia da manifestación contra os posibles indultos aos independentistas cataláns que se celebrará o domingo día 13 na madrileña Praza de Colón. O presidente da Xunta considera que “as sociedades democráticas se expresan democraticamente nas rúas” e que “hai razóns poderosas para protestar” contra o Goberno de Pedro Sánchez. Na manifestación da dereita contra Sánchez no mesmo lugar en febreiro de 2019 Feijóo mudara a súa axenda para regresar antes doutra viaxe a Miami e chegar a tempo de unirse á marcha.

• HEMEROTECA | Feijóo únese en Madrid á marcha da dereita e carga contra Sánchez por "negociar a soberanía nacional"

📺VÍDEO | Que almorzan os Verto para faceren esa música pop que está a conquistar públicos novos dentro e fóra de Galicia? A resposta, neste almorzo con Deleite en VINTE

PARO REXISTRADO | As inscricións nas oficinas de emprego galegas descenderon durante o mes de maio en 5.472 e quedan en 165.306, o que supón 25.776 menos que hai un ano. No mesmo mes, a afiliación media á Seguridade Social aumentou en 8.534 persoas e sitouse en 1,01 millóns, 34.134 (+3,5%) máis que doce meses antes. A análise dos datos, hoxe en Praza.gal

• AMPLIAMOS 👉 A afiliación á Seguridade Social volve en Galicia a niveis previos á pandemia pendente de 23.000 persoas en ERTE
• HEMEROTECA | A fin da renovación automática da 'tarxeta do paro' que só aplican Galicia e Euskadi permite á Xunta inchar a baixada do desemprego

A Pobra do Caramiñal (na imaxe, CC-BY-SA Praza Pública) e Mos manteñen o seu peche perimetral. Os municipios de Ordes e Viveiro quedan no nivel alto de restricións. Son as últimas decisións do comité clínico que asesora á Xunta coa pandemia, que levanta o nivel máximo de restricións en Lobios, que agora fica en nivel medio xunto aos concellos de Moraña, Ponteareas, Cenlle, O Barco de Valdeorras, Ribeira, Boiro, Oroso, Xove, Vilalba e Monforte de Lemos.

As novas medidas entrarán en vigor ás 00:00 horas do vindeiro sábado, 5 de xuño.

• MAPA INTERACTIVO | Restricións da Xunta pola COVID-19 dende o sábado, 5 de xuño