Fálase

Controversia en Portugal ao prohibir a Policía no estadio do Sporting Clube de Braga un tifo que reivindica a relación histórica con Galicia ou referentes do antigo Reino suevo no derbi do Minho fronte ao Vitória de Guimarães. A Policía de Segurança Pública (PSP) obrigou a retiralo entre duras críticas da afección e tamén do club, que nun comunicado oficial considera que "em 2026 exista em Portugal uma força de segurança que rasura mensagens pela análise da sua significância é algo que a todos, enquanto sociedade, nos deve preocupar, não podendo deixar de ser notado o forte odor a outros tempos, nada saudosos". O SC Braga anuncia que prevé recorrer a todas as instâncias no sentido de assegurar que este lamentável episódio" de censura "não mais se repetirá". [Imaxe: © SC Braga]

O Marineda Hockey da Coruña proclámase campión da Copa Princesa tras derrotar o Alcalá por 3-2 na final. O equipo galego, fundado o pasado ano, acada o primeiro título e mantense líder na loita por ascender á máxima categoría. 

Alfonso Rueda celebrou os dous anos da vitoria electoral por maioría absoluta e culpou o Goberno central de deixar a provincia de Lugo "sen conexión eléctrica para que non haxa unha industria", en referencia ao arquivo do expediente de Altri, empresa que non citou durante a súa intervención. O presidente da Xunta cargou contra "quen se opón por sistema a que haxa industria". 

A organización xuvenil vasca Gazte Koordinadora Sozialista (GKS) reivindica nun vídeo a vandalización do busto de Manuel Fraga polo 50º aniversario dos sucesos de Vitoria. O PPdeG condena que "un grupo radical presuma" do acto e pide a BNG e PSOE "que se sumen á condena e non o avalen como parte da súa estratexia de conflito". O ex-presidente da Xunta era ministro de Gobernación no goberno de Franco cando a policía armada matou cinco folguistas nunha asemblea obreira. 

A Xunta desactiva o Plan Inungal para a vixilancia dos ríos por posibles desbordamentos logo de máis dun mes. Ningunha estación presenta risco tras varias semanas de abundantes chuvias. 

Grande Amore únese á reivindicación de Aquí tamén se fala polo topónimo oficial no Deportivo. A actuación do artista mariñao, adiada en xaneiro, tivo lugar este sábado na previa do partido do equipo coruñés. 

• "Da Coruña": a anomalía no topónimo do Deportivo albisca o seu fin
• "O Dépor é da Coruña": 'Aquí tamén se fala' aprema o club a usar o topónimo oficial nunha ambiciosa campaña
• O Dépor xa é "da Coruña" para o Concello: a terceira rolda perde o 'L'

O Goberno de España propón deixar sen publicidade estatal os medios que dependan do público por riba do 35%. A futura lei será de aplicación a comunidades e concellos pero non limita o fluxo de cartos destas administracións aos medios. O anteproxecto prevé deitar luz sobre o diñeiro público que nutre as empresas de comunicación. 

Alfonso Rueda denuncia a vandalización do busto de Manuel Fraga en Vilalba. O presidente da Xunta acusa os autores de "non respectar os símbolos" nin o presidente "que conseguiu catro maiorías absolutas de todos os galegos". "Non respectan máis que o seu propio sectarismo", asegura nunha publicación en X. 

• “Buscade no río”: A pista xeralizada en Vilalba para atopar o busto de Fraga

IU, Comuns, Más Madrid e Sumar celebran en Madrid un acto para a refundación da súa alianza electoral. Baixo o lema Un paso al frente, ministros como Ernest Urtasun ou Mónica García ou o líder de Izquierda Unida, Antonio Maíllo, protagonizan un encontro apoiado polos secretarios xerais de CCOO e UGT e coa presenza de representantes de BIldu, ERC ou Compromís. "O novo sentido común é a unidade", advirten. 

Centos de persoas manifestáronse este venres en Vigo pola gratuidade da AP-9 e a supresión das peaxes. "Basta xa! 40 anos pagando", rezaba o lema dunha marcha á que asistiron representantes de entidades veciñais da cidade e da comarca e do BNG e do PP, pero non do PSdeG. Foto: CC-BY-NC-SA BNG.