- 🟪🟧🟦 EN VINTE | A costa do Ortegal, un miradoiro infinito
Para esta Semana Santa, o Xeoparque do Cabo Ortegal preparou un amplo catálogo de actividades de turismo activo. A proposta comeza este sábado, 28 de marzo, e desenvolverase durante un total de nove días ata o próximo domingo, 5 de abril
Hai case tres anos a UNESCO confirmou o Xeoparque do Cabo Ortegal como un dos novos xeoparques recoñecidos internacionalmente. A iniciativa dos concellos de Cariño, Cedeira, Cerdido, Moeche, Ortigueira, San Sadurniño e Valdoviño e a Deputación da Coruña converteuse no segundo xeoparque galego, despois do do Courel, e no 16º existente no Estado. O espazo fixo valer as súas condicións xeolóxicas excepcionais e a incrible beleza das súas paisaxes, que non están entre as máis coñecidas de Galicia.
Dende entón, o Xeoparque Cabo Ortegal vén desenvolvendo unha intensa actividade de promoción e de iniciativas, buscando promover as visitas á comarca e, sobre todo, desenvolver un turismo activo e sustentable, no que as actividades ao aire libre e o goce das súas paisaxes e espazos é a clave.
As experiencias están deseñadas para que as persoas visitantes poidan achegarse ao territorio do xeoparque e coñecer o seu patrimonio natural, histórico e cultural dun xeito único e atractivo, mentres realizan deporte ao aire libre
Para esta Semana Santa, o Xeoparque preparou un amplo catálogo de actividades de turismo activo. A proposta comeza este sábado, 28 de marzo, e desenvolverase durante un total de nove días ata o próximo domingo, 5 de abril.
As actividades están adaptadas a todo tipo de públicos, sempre respectando os valores de sostibilidade e respecto coa contorna promovidos desde o Xeoparque Cabo Ortegal. As persoas interesadas deberán reservar a súa praza previamente a través do sitio web geoviajesortegal.com e consultar os detalles especificados para cada unha das iniciativas.
Os e as visitantes poderán realizar diferentes rutas de sendeirismo a pé ou a cabalo, e tamén descubrir a vía ferrata da Senda do Santo
As experiencias están coidadosamente deseñadas para que as persoas visitantes poidan achegarse ao territorio do xeoparque e coñecer o seu patrimonio natural, histórico e cultural dun xeito único e atractivo, mentres realizan deporte ao aire libre. Deste xeito, os e as visitantes poderán realizar diferentes rutas de sendeirismo a pé ou a cabalo, e tamén descubrir a vía ferrata da Senda do Santo.
Programa completo:
- Sábado 28/03: XeoRuta do Toelo en Moeche
- Domingo 29/03: Ruta Cal da Loba a cabalo
- Luns 30/03: Vía Ferrata Senda do Santo
- Martes 31/03: Ruta Acantilados de Loiba e Ribeira do Carro
- Mércores 01/04: Sendeiro das Ferrerías en Valdoviño
- Xoves 02/04: Altos de Santo André entre flora, fauna e xeoloxía
- Venres 03/04: Unha viaxe mariñeira en Cedeira
- Sábado 04/04: Ruta ecuestre de Meirás
- Domingo 05/04: XeoRuta da Lousa en San Sadurniño
