As traballadoras da CRTVG mobilizadas levan 157 venres negros reclamando o cumprimento da lei
Tres anos de venres negros. Tres anos defendendo a radio e a televisión pública de Galicia desde dentro e cun chamado a toda a cidadanía. Tres anos reclamando o cumprimento da lei na Corporación Radio Televisión de Galicia (CRTVG). Co #VenresNegro157CRTVG o movemento Defende a Galega celebra un novo aniversario en medio do proceso para a remuda do consello de administración do ente público no Parlamento.
Sería o cumprimento dunha das súas principais demandas se atinxise ao seu director xeral, Alfonso Sánchez Izquierdo, que leva doce anos no cargo a pesar de que a súa continuidade tiña que terse sometido a votación en 2012. Esta segunda elección será, polo tanto, unha solución a medias para Defende a Galega.
″Para cando a renovación do director xeral, no cargo desde 2009, cando a Lei de Medios establece un período de 5 anos?″, preguntábanse desde as redes de Defende a Galega. Mentres, o prazo para a escolla das seis persoas que entren a formar parte do consello de administración está en marcha e calquera elección precisa do apoio do grupo do PP e mais dun dos partidos da oposición, BNG ou PSdeG, para saír adiante.
O director xeral da CRTVG, Alfonso Sánchez Izquierdo, permanece desde 2009 no cargo
A lei dos medios públicos está incumprida desde os seis meses seguintes á súa aprobación pola permanencia de Alfonso Sánchez Izquierdo no seu cargo, ao que chegou á vez que Alberto Núñez Feijóo á Xunta. A pesar das críticas internas das traballadoras e traballadores que denuncian a manipulación partidista dos contidos dos medios públicos e das peticións de saída do director xeral realizadas pola oposición, o Goberno galego evita pronunciarse. A última vez que o fixo foi en resposta a unha pregunta escrita formulada desde o PSdeG na Cámra galega sobre a remuda do director xeral na que a secretaria xeral de Medios, Mar Sánchez Sierra, apelou ao ″diálogo″: "Precísase, polo tanto, da existencia dunhas condicións de 'diálogo parlamentario' que permitan acadar un acordo de maioría reforzada ao redor do perfil do director xeral da Corporación Radio e Televisión de Galicia".
A mobilización de Defende a Galega resulta xa inédita nos medios de comunicación estatais pola súa duración. En concreto, os tres anos de reivindicacións fanse este 25 de maio. Porén, desde a CRTVG trátase de minimizar a súa repercusión pública, como se demostrou en 2019 ao non informar do recoñecemento do Premio José Couso á liberdade de prensa outorgado polo Colexio Profesional de Xornalistas de Galicia e o Club de Prensa de Ferrol. As traballadoras mobilizadas da CRTVG fan un ano máis de reivindicacións nas que inciden semana tras semana.
"A CRTVG non pode servir outros intereses que non sexan os de Galicia e as galegas", afirma Defende a Galega
Levan tres anos poñendo o foco en que para que os medios públicos cumpran co seu labor designado por lei, o de informar á cidadanía, as profesionais teñen que contar coa liberdade necesaria para abordar o seu traballo. Reclaman o incremento da produción propia e a reapertura das delegacións pechadas como medidas para que medre a "perspectiva galega" nos contidos. "A CRTVG non pode servir outros intereses que non sexan os de Galicia e as galegas; nin os de quen está en San Caetano nin os dos que están en Madrid", incidían no 155 venres negro.
No histórico queda xa a folga de 2018 secundada por unha ampla maioría das traballadoras e traballadores do ente público que solicitaba o cese da "política represiva" denunciada en casos como os que levaron á dimisión dos dous presentadores do Telexornal Serán, Tati Moyano e Alfonso Hermida. Tamén a gran manifestación que percorreu compostela e na que participaron as traballadoras de RTVE en Galicia. Pero os motivos para a reivindicación, segundo Defende a Galega, seguen vixentes. Por iso, neste terceiro aniversario agradecen o apoio da cidadanía con este #GrazasPorDefenderAGalega.
