Os comicios reforzan a gobernante Aliança Democrática de Luís Montenegro e elevan a extrema dereita do Chega ata disputar o segundo posto ao Partido Socialista nunha noite negra para a esquerda do país veciño
Hai un ano, Portugal virou á dereita. Agora, o electorado portugués entrégase de vez ás dereitas nas que son as súas terceiras eleccións lexislativas en apenas tres anos. Ao centro-dereita da coalición Aliança Democrática que encabeza o PSD -o irmán político do PP no país veciño-, mais tamén á extrema dereita populista e autoritaria do Chega, segundo indica o inquérito da RTP e é posible albiscar no avance do reconto oficial, no que restan unha trintena dos 230 escanos da Assembleia da República por atribuír -incluíndo os 4 das circunscricións dos estranxeiro- no momento de redactar esta información.
Nunha cita electoral con arrecendo a laboratorio ibérico e mesmo europeo, como apuntaba Anxo Lugilde en La Vanguardia, a vaga dereitista que percorre múltiplos países do mundo tradúcese á portuguesa non só na xa agardada primeira posición da gobernante e agora, aínda que lonxe da maioría absoluta, fortalecida AD de Luís Montenegro, primeiro ministro de 2024. Tamén -e, se cadra, sobre todo-, no pronunciado ascenso da extrema dereita que encabeza o controvertido André Ventura, ata o punto de competir pola segunda posición co enfraquecido Partido Socialista.
Nas súas segundas eleccións con Pedro Nuno Santos á fronte, o PS sofre un duro pau nunha noite negra para a esquerda portuguesa en xeral. Fronte ao crecemento da AD -en torno a unha vintena de escanos por riba dos 80 cos que contou Montenegro o pasado ano, segundo o inquérito da RTP-, os socialistas perderán en torno a unha decena ou mesmo máis alá (tiñan 78) sen que o resto da esquerda se beneficie o máis mínimo da súa caída.
Neste escenario e á espera do detalle dos resultados definitivos, todo apunta a que a gran cuestión postelectoral -alén da máis que complexa continuidade do líder do PS no cargo- será se, como en 2024, Montenegro mantén a promesa de evitar os pactos coa extrema dereita. Isto é, se o ascendente Chega fai parte do xogo de gobernabilidade ou, pola contra, tras este terremoto político a AD procurará que o PS facilite as grandes decisións ao primeiro ministro conservador.
Da absoluta do socialista Costa á moción de confianza de Montenegro
Os resultados teñen como inevitable contexto a inestabilidade política que vén marcando o país veciño dende a dimisión do socialista António Costa por un caso de presunta corrupción do que ficou exonerado pouco despois
Os resultados deste 18 de maio teñen como inevitable contexto a inestabilidade política que vén marcando o país veciño dende a dimisión en novembro de 2023 de António Costa como primeiro ministro polo Partido Socialista. Un caso de presunta corrupción reducido á mínima expresión no eido xudicial e do que ficou exonerado agora presidente do Consello Europeo fulminou o Goberno sustentado na histórica maioría absoluta do PS en 2022 e abriu as portas en marzo de 2024 ao primeiro Goberno conservador dende 2015.
Foi outro caso de presuntas prácticas irregulares o que precipitou as eleccións deste domingo. A comezos deste ano, tras anunciar o gabinete da AD unha reforma da Lei de Solos, transcendeu un caso de presunto conflito de intereses en torno a Spinumviva, empresa familiar do primeiro ministro. A cuestión derivou na presentación dunha moción de confianza na Assembleia da República que Montenegro perdeu, precipitando os comicios.
