A Audiencia de Ourense atende o recurso do rexedor e anula o auto do xulgado que o enviaba a xuízo por prevaricación por non pedir a compatibilidade entre o seu posto público e a actividade privada xestionando unha canle televisiva
Outro caso Jácome arquivado. A Audiencia Provincia de Ourense vén de atender o recurso do alcalde ourensán contra o auto do xulgado que, o pasado abril, o deixou ás portas dun xuízo por prevaricación por non pedir expresamente permiso ao pleno municipal para compatibilizar as súas actividades privadas -esencialmente, xestionar a súa canle televisiva Auria TV- co posto de rexedor, o cal para o xuíz instrutor podía supoñer que levase sete anos cobrando indebidamente das arcas municipais.
Se o proceso seguise adiante, máis aínda despois dunha petición da Fiscalía formulada hai escasos días, Gonzalo Pérez Jácome expúñase a ser inhabilitado ou, o que é o mesmo, a perder o bastón de mando e ficar fóra de xogo para as eleccións de 2027. Pero a Audiencia vén aplicar un xiro de guión ao revogar o auto ao considerar que a conduta de Jácome non encaixa no tipo penal da prevaricación administrativa.
"Non toda omisión ou incumprimento dun deber por parte dun funcionario pode catalogarse de prevaricación administrativa omisiva por non ser equivalente a unha resolución arbitraria expresa", indica nun auto ditado este venres. A resolución agrega ademais que Jácome "entendeuse amparado" por un informe da asesoría xurídica municipal e por unha actuación pasada da Fiscalía, que "tras abrir dilixencias, finalizou arquivando as mesmas por entender que non existía infracción penal e si unha irregularidade de carácter administrativo".
"Non toda omisión ou incumprimento dun deber por parte dun funcionario pode catalogarse de prevaricación administrativa omisiva por non ser equivalente a unha resolución arbitraria expresa", di o tribunal
"Se ben é certo que puideron faltar datos" para que o asesor municipal chegase a esa conclusión, enfatiza a Audiencia, o alcalde "púidose ver amparado". E en calquera caso, "a prevaricación administrativa, tamén na súa modalidade omisiva" -non facer algo que se debe facer- "esixe a existencia dun deber xurídico concreto" cuxa "inobservancia deliberada produza un resultado materialmente equiparable ao ditado dunha resolución arbitraria e inxusta". "Non basta -sintetiza- a mera infracción dunha norma administrativa nin o incumprimento de obrigas derivadas do réxime de incompatibilidades dos cargos públicos".
Neste contexto, a Sala razoa que, en tal caso, "resultaría propio da xurisdicción contencioso-administrativa, vía á que non se acudiu", dilucidar a cuestión que remata percorrido penal con este auto, contra o que cabe recurso de casación. O tamén líder de Democracia Ourensana celebra o ditame no que considera un "bo día para OUrense" porque "a verdade volveu atopar un camiño para impoñerse". "Non será a última denuncia contra min mentres siga sendo alcalde, vaime no cargo", acrecenta nunha mensaxe nas redes sociais.
