Como o seu marido e antecesor, Alberto Pardellas, condenado hai unha década, outro pavillón ilegal supón a inhabilitación tamén de Cristina Francisco, investigada ao tempo polo Tribunal de Cuentas por un gasto de 156.000 euros sen xustificar
A Audiencia Provincial de Ourense vén de ratificar a condena a María Cristina Francisco Vílchez, alcaldesa de Melón polo PP entre 2011 e 2019, por un delito de desobediencia por non cumprir un mandato xudicial firme que a obrigaba a derrubar un pavillón levantado ilegalmente. Francisco Vílchez recibiu a alcaldía en 2011 de mans do seu marido, Alberto Pardellas, que gobernaba a vila desde 2002, cando el foi condenado por prevaricación por levantar outro pavillón deportivo distinto a carón do protexido mosteiro cisterciense da vila. Ademais a ex-rexedora está a ser investigada polo Tribunal de Cuentas por outro caso de pagos sen xustificar por 156.000 euros autorizados por ela.
Cristina Francisco foi condenada en primeira instancia polo xulgado do Penal 2 de Ourense nunha sentenza con data do pasado 8 de outubro, recorreu e agora a Audiencia avala a súa condena. A rexedora, segundo ratifica a xustiza, negouse de xeito reiterado a cumprir cunha orde xudicial de repoñer a legalidade e derrubar o pavillón denominado Cruceiro Gordo.
"Existía un mandato claro e terminante, ditado por órgano xudicial competente, revestido de todas as formalidades legais, mandato que ademais era firme, e sen embargo, non se procedeu por parte da autoridade, a alcaldesa, a darlle debido cumprimento, revelándose o propósito de incumprir pola súa parte, a partir do reiterado actuar oposto ao acatamento da orde que se lle dirixía", dicía a sentenza de primeira instancia agora ratificada.
Cristina Francisco é condenada a unha multa de 1.800 euros e un ano de inhabilitación por "comportamentos claramente vulneradores do que se lle ordenaba", que non foi cumprido ata que o PSdeG a reemplazou na alcaldía
A orde xudicial de derruba do pavillón "non se cumpriu en ningún momento ao longo dos máis de catro anos que transcorreron desde que recibiu o primeiro requirimento persoal para que cumprise o mandato ata que cesou no cargo" en 2019. Foi só tras a súa saída da alcaldía cando o seguinte alcalde, do PSdeG, atendeu a orde xudicial. "Non se concibe que o que o novo alcalde do Concello comprendeu de maneira inmediata tras acceder ao cargo non puidera advertilo a acusada nos máis de catro anos que transcorreron e nos que foi requirida ata en tres ocasións para o cumprimento", salientaba a sentenza.
Agora a Audiencia Provincial de Ourense desbota o seu recurso e insiste en que "lonxe de dar cumprimento ao ordenado, puxo en marcha un plan para tratar de legalizar as obras levadas a cabo, desoíndo mentres tanto os claros requirimentos que se lle facían, burlando de tal modo o cumprimento de sentenzas firmes". O tribunal desbota, como argumentaba ela, que se reducise a súa responsabilidade por contar con asesoramento xurídico, que se cualifica como "absolutamente erróneo" e "que non exclúe a responsabilidade persoal da recorrente, que como alcaldesa era a única obrigada e que por iso agora ha de responder penalmente". Por iso, a Audiencia, "compartindo as acertadas razóns xurídicas" da primeira sentenza, ratifícaa.
Queda así avalada a condena de Cristina Francisco a 6 meses de multa con cota diaria de 10 euros, "o que supón un total de 1.800 euros", e a un ano de inhabilitación. No seu momento o seu marido, Alberto Pardellas, fora condenado a 8 anos de inhabilitación, pero seguiu sendo asesor da súa muller no Concello e mesmo seguiu a ser recibido por cargos da Xunta acompañando á rexedora. Cando a oposición pediu explicacións ao Goberno galego, o daquela vicepresidente e agora presidente Alfonso Rueda chegou a insinuar que o feito de poñer o foco nunha persoa inhabilitada que xa non estaba no PP pero seguía sendo atendida por cargos do PP, e non na súa muller que era formalmente a alcaldesa, era machismo.
Ademais desta condena por desobediencia, Cristina Francisco tamén está a ser investigada polo Tribunal de Cuentas por 156.000 euros pagados polo Concello "sen constancia das prestacións recibidas". O ente fiscalizador calculara incialmente en 340.000 euros a presunta ilegalidade pero despois rebaixouna a 156.000, aínda que rexeitou en varias ocasións arquivar o caso, que segue en curso.
Os Pardellas-Francisco gobernaron de 2002 a 2019: cando el foi inhabilitado seguiu sendo 'asesor' da súa muller, e cando superou a súa condena ela fíxose a un lado e el volveu ser o candidato do PP, pero sen lograr recuperar a alcaldía
Cristina Francisco asumiu a alcaldía de Melón en 2011, cando o marido foi inhabilitado, e foi a candidata do PP e gañou as eleccións municipais de 2015. Pero xa non logrou facer o mesmo nas de 2019, cando toda a oposición se uniu nunha única candidatura contraria do PSdeG. Se antes os populares tiñan 5 dos 9 concelleiros da Corporación, por 4 dos socialistas, naquel ano a situación inverteuse e o PSdeG pasou a ter 5 edís, por 4 do PP.
Catro anos máis tarde, nas municipais de 2023, Pardellas xa cumprira a súa condena de inhabilitación, así que a súa muller fíxose a un lado e el volveu ser o candidato do PP. E os seus resultados foron aínda peores que os últimos da súa muller, baixando de 4 a 3 edís e pasando dos 372 votos da última candidatura da súa muller a só 232.
