O Goberno galego fixo que as universidades nomeasen representantes pero en 2016 mudou a normativa para só convocar os expertos “sempre que a continxencia o requira” ou “se cómpre”, algo que el mesmo decide
Tras sucesivas melloras materiais e normativas tras o accidente do Prestige, en 2012 a Xunta aprobou un decreto co que seguiu reformando a estrutura e organización do seu plan de actuación ante a contaminación mariña e estableceu a creación dun Comité Técnico Asesor na materia. O Goberno galego fixo que as universidades nomeasen representantes, pero en 2016 mudou a normativa para só convocar os expertos “sempre que a continxencia o requira” ou “se cómpre”, algo que decide a propia Xunta.
Isto fixo que ata agora eses expertos nunca se reunisen. Só o farán se hai unha emerxencia catalogada como de nivel medio e, mesmo nese caso, se a Xunta así o decide.
![](https://praza.gal/storage/uploads/camgal-d826871.jpeg)
O decreto aprobado en 2012 para seguir mellorando as actuacións da Xunta en materia de contaminación mariña establecía que “o Comité Técnico Asesor é o órgano que desenvolve funcións de asesoramento técnico e científico no Centro de Coordinación Operativa” que o Goberno galego ten que crear ante cada evento de contaminación mariña. Porén, esa redacción foi mudada en 2016 para introducir o matiz de “sempre que a continxencia o requira”.
O Comité Técnico Asesor só sería convocado ante unha emerxencia de nivel medio, que segundo dixo a Xunta o venres só se deu nunha ocasión na última década, pero incluso neses casos só se faría se así o quere o Goberno galego
Tanto na redacción de 2012 como na de 2016 estableceuse que ese comité asesor está integrado por persoal técnico da propia Xunta. E "así mesmo, poderán formar parte deste comité representantes das universidades galegas, do Consejo Superior de Investigaciones Científicas” e dos centros do Instituto Español de Oceanografía con sede en Galicia.
Tamén se fixou que “para poder formar parte deste comité, no caso das universidades galegas” e dos outros dous centros de investigación estatais estes “deberán nomear unha persoa representante e comunicalo á consellería competente na materia”, algo que as universidades fixeron hai dez anos. Pero ese comité nunca se reuniu.
![](https://praza.gal/storage/uploads/simulacro-e6c7409.jpeg)
Ademais de establecer na modificación do decreto de 2012 aprobada en 2016 que o comité asesor só será convocado cando “a continxencia o requira”, aquela norma tamén remite ao Plan Territorial de Continxencias por Contaminación Mariña Accidental de Galicia (Plan Camgal), o último deles de 2021. Nel dise que a competencia para dirixir ese plan e as actuacións ante un evento de contaminación é da "persoa titular da Subdirección xeral de Gardacostas de Galicia”, e entre os seus cometidos está “convocar e constituír, se cómpre, o Comité Técnico Asesor” no seo do centro de coordinación que atenda cada emerxencia.
Pero mesmo esa convocatoria e constitución está limitada no Plan Camgal ás emerxencias de nivel medio dentro dos distintos niveis de aplicación do documento que se contemplan: permanente, alerta, emerxencia de nivel mínimo, emerxencia de nivel medio e emerxencia de nivel máximo, neste último caso con intervención das autoridades estatais.
O Comité Técnico Asesor en materia de contaminación mariña queda así restrinxido a unha actuación excepcional que ata agora nunca se deu. O pasado venres, dous días antes do aniversario do accidente do Prestige, e no marco dun simulacro de actuación ante a contaminación mariña, a propia Consellería do Mar fixo balance das activacións do Plan Camgal desde 2012, un total de 75, “das que 67 foron en fase de alerta, sete en situación 1 (emerxencia de nivel mínimo) e unha en situación 2 (emerxencia de nivel medio)”.
Porén, a propia Xunta informou cando menos en 2020 de dúas activacións distintas do nivel medio en setembro e decembro daquel ano. En todo caso, o Comité Técnico Asesor en materia de contaminación mariña creado en 2012 e para o que as universidades designaron expertos nunca foi reunido, tampouco en simulacros.