O Estado propón que os Franco só poidan levar do Pazo de Meirás, polo momento, os electrodomésticos e os bens que non aparecen no inventario elaborado pola Xunta, agás fondos bibliográficos, alfombras e "elementos textís de todo tipo".
A Avogacía do Estado, en resposta á demanda da xuíza, propón que os Franco só leven de Meirás os electrodomésticos e os bens que non aparecen no inventario
Así o solicita a Avogacía do Estado nun escrito presentado ante o Xulgado de Primeira Instancia número 1 da Coruña en resposta á solicitude da xuíza, que reclamara unha aclaración sobre os bens que podían retirar os herdeiros do ditador das Torres, declarado patrimonio público por unha sentenza executada provisionalmente á espera da resolución do recurso.
No escrito, ao que tivo acceso Praza.gal, aclárase que non formarían parte dos bens inventariados "as roupas e os obxectos de uso persoal, nin os enxovais domésticos de uso diario ou habitual no actual funcionamento da vivenda, nin o mobiliiario e os obxectos meramente funcionais que existen nas dependencias de servizo".
Ademais, a Avogacía do Estado matiza que, "adicionalmente", poderase valorar a entrega dalgún outro ben concreto e mesmo dalgúns bens xa inventariados no caso dunha petición "de forma singularizada" por parte dos Franco e "a medida que fose posible precisar mellor o seu grao de conexión co BIC e cos usos futuros deste".
A Avogacía do Estado pediu ao Goberno central e á Xunta que achegasen as súas matizacións sobre a proposta, pero o Executivo de Feijóo nin respondeu
Para levar a cabo esta proposta sobre os bens que poden ser retirados pola familia do ditador, aclara a Avogacía do Estado que solicitou á Consellería de Cultura, Educación e Universidade da Xunta, a Patrimonio Nacional e á Secretaría de Estado de Memoria Democrática que manifestasen as súas "matizacións, precisións ou correccións".
Segundo explica, tanto Patrimonio Nacional como a Secretaría de Estado "manifestaron de forma expresa a súa conformidade" co criterio da Avogacía do Estado, que destaca, no entanto, que a Consellería "non formulou matizacións, precisións ou correccións respecto a esta formulación no prazo no que se lle solicitou que manifestase o seu parecer". Xa que logo, a Xunta non contestou á demanda da Avogacía do Estado mentres si o facían os dous organismos consultados do Goberno central.
A xuíza Marta Canales xa acordara unha medida cautelar para decretar o depósito de todos os bens mobles do Pazo, agás aqueles de estrito uso persoal ou que non achegasen nada á significación das Torres como BIC ou aos seus futuros usos. A familia do ditador recorrera aquel auto e alegaba que o decreto que declarou Ben de Interese Cultural o inmoble non incluía ningún anexo sobre os bens, unha aclaración que solicitara, por exemplo, o Concello de Sada para deixar claro que obxectos non poderían ser sacados do interior en ningún caso.
Ademais, o Xulgado de Primeira Instancia número 1 da Coruña emitiu a pasada semana unha dilixencia na que informa da entrega das chaves da vivenda dos gardiáns do Pazo de Meirás, que foi realizada no último día do prazo fixado pola maxistrada.
