O Goberno galego atribúe ao municipal a súa decisión de "deixar en suspenso" a infraestrutura ao paso polo bosque do Banquete de Conxo, obra desautorizada pola directora xeral de Patrimonio minutos antes de dimitir
O 22 de maio Praza.gal publicou un informe asinado minutos antes de dimitir pola directora xeral de Patrimonio da Xunta, Carmen Martínez Insua, no que decidía "non autorizar" o trazado proposto a través do bosque do Banquete de Conxo pola Consellería de Infraestruturas para a "estrada para ciclistas" que está a executar en Santiago. Pouco despois de coñecerse ese informe contrario, a consellería anunciaba a súa decisión de deixar "en suspenso" ese treito da infraestrutura e destinar os fondos a "outro concello".
Porén, na resposta oficial que vén de ofrecer agora ao Parlamento de Galicia sobre a cuestión a Xunta obvia por completo o informe negativo do seu propio departamento de Patrimonio e di que parou a obra "fundamentalmente" pola postura contraria do Concello ao impacto que tería.
A infraestrutura que impulsa a Xunta en Santiago pretende conectar O Milladoiro e San Caetano con 10 quilómetros de sendas para peóns e bicicletas, unha "estrada para ciclistas", como a denominou o propio Goberno galego, que orzamentou 12 millóns de euros.
Está rematada ou moi avanzada na maioría do seu trazado, pero ao paso polo denominado bosque do Banquete de Conxo o seu impacto levou a formular varias alternativas. A última elixida foi rexeitada pola directora xeral de Patrimonio minutos antes de dimitir o pasado 12 de maio, segundo se soubo dez días máis tarde, porque, "aínda que minora de xeito importante as afeccións", aínda tiña "tramos incompatibles coa protección do patrimonio cultural e a conservación dos seus valores".
Ao coñecerse ese informe de Patrimonio, Infraestruturas decidiu deixar "en suspenso" ese treito da obra ao seu paso por Conxo e destinar os fondos a "outro concello". Tamén salientou que malia ese último informe negativo de Patrimonio, "permanece vixente o proxecto orixinal que conta con todos os informes sectoriais favorables". Unha resposta na que Infraestruturas non aclarou por que nese caso non acomete o proxecto orixinal se conta con todos os permisos, e ao tempo deixou en evidencia ao departamento de Patrimonio por eses permisos previos.
Carril bici ao paso por Conxo
-
Chegada do carril bici desde O Milladoiro á zona de Conxo, coa obra da senda moi avanzada e onde as bicis compartirán espazo na calzada cos coches -
Lugar no que o ramal do carril bici que comunica O Milladoiro co barrio de Santa Marta continuará cara a San Caetano e o resto do carril bici a través das rúas Benéfica, ao fondo na imaxe, e Ramón Baltar xa existentes en Conxo -
Subida do ramal cara ao barrio de Santa Marta -
O ramal a Santa Marta nas proximidades do seu remate, aínda lonxe do hospital -
Subida actual a Conxo desde o ramal a Santa Marta por onde a Xunta argumentaba que non había espazo para o carril bici e por onde pasará finalmente ao renunciar a facelo polo bosque -
Rúa Ramón Baltar pola que continuará o carril bici desde a praza de Conxo como alternativa ao paso polo bosque -
A infraestrutura pasa de Conxo ao Restollal polo túnel, xa acondicionado, baixo as vías do tren e a SC-11 -
Á saída do túnel, a senda continúa pola beira dereita do río Sar ata meterse no parque Eugenio Granell, duplicando con trazados de nova construción sendas xa existentes na zona
O Goberno galego insiste en que a obra pasaría por Conxo "sen afección ningunha" malia que para Patrimonio tiña "tramos incompatibles coa protección do patrimonio cultural"
Sobre esta situación preguntou formalmente o BNG á Xunta no Parlamento de Galicia, e a resposta oficial realizada polo Goberno galego obvia o seu propio departamento de Patrimonio. En folio e medio de resposta a Xunta insiste en defender as bondades do seu proxecto sen citar en ningún momento o informe contrario de Patrimonio. Ao contrario, contra o final da resposta dise que "o novo trazado evitou o cruce do río Sar, sen afección ningunha a ningún elemento natural nin patrimonial protexidos".
Segundo a Xunta, a información pública do seu proxecto modificado "tivo como resultado só unha alegación contraria ao proxecto, pero dada a postura do Concello de Santiago fundamentalmente, decidiuse deixar en suspenso o treito" que pasa por Conxo.
Nada di o Goberno galego na súa resposta oficial sobre o anuncio xa realizado polo portavoz local do PP, Borja Verea, de que, fronte á decisión da Xunta de paralizar a obra, el está disposto a executala "cando goberne en 2027".
