"Podo confirmar oficialmente que estou en disposición de presentarme a ese proceso", asegurou no Parlamento, onde asiste como convidado ao último debate de política xeral da lexislatura
José Ramón Gómez Besteiro confirmou este luns que quere ser o candidato do PSdeG nas vindeiras eleccións galegas e que se presentará ás primarias que o comité federal socialista pon agora en marcha. "Podo confirmar oficialmente que estou en disposición de presentarme a ese proceso", asegurou en declaracións á prensa presente na Cámara ao comezo do debate de política xeral.
O agora deputado socialista no Congreso non entrou a valorar se haberá máis candidatos nas primarias do partido. "Nin espero nin desespero", dixo ao ser preguntado por se espera que se presente alguén máis a este proceso, que lembrou que é colectivo e individual.
Besteiro asiste ao último debate de política xeral da lexislatura, que se celebra nun clima preelectoral. "É un final de ciclo", asegurou o socialista, que ve a Rueda "enfrontado con todo o mundo", en referencia ao Goberno do Estado, pero tamén aos concellos galegos.
Regresou á primeira liña política como Delegado do Goberno seguindo o mandato de Pedro Sánchez a comezos de abril, apenas tres meses despois de recuperalo como representante galego do seu Executivo, o líder do PSOE apostou por el tamén para as eleccións do 23 de xullo. Xa como deputado no Congreso abriu a lexislatura cun discurso no que puido falar en galego por primeira vez na Cámara Baixa e agora forma parte do equipo negociador para acordar a investidura de Sánchez de novo como presidente.
